Истанбулдаги авиафалокат 3 кишининг ўлимига сабаб бўлди

5 февралда Истанбулдаги Сабиҳа Гўкчан аэропортига қўниш вақтида йўловчи самолёти фалокатга учрагани маълум қилинганди. Охирги маълумотларга кўра, фалокат оқибатида 3 киши ҳаётдан кўз юмган.

Фото: REUTERS / Murad Sezer

Аввалроқ Pegasus Airlines авиакомпаниясининг Измирдан Истанбулга рейс бажарган Boeing 737 самолёти қўниш вақтида аэропортнинг учиш-қўниш йўлакчасида тўхтай олмай, ундан 60-70 метрга чиқиб кетгани ва 40 метрлик жарликдан пастга қулаб, учга бўлакланиб кетгани маълум қилинганди.

Самолётда 177 йўловчи ва экипажнинг 6 аъзоси бўлган.

Дастлаб ҳеч ким ҳалок бўлмагани, бироқ 52 кишини шифохонага жўнатишга тўғри келгани таъкидланганди.

Бироқ охирги маълумотларга кўра, фалокат 3 кишининг ўлимига олиб келган, 179 киши жароҳат олган.

Маълум қилинишича, аэропорт вақтинчалик ёпилган, Туркия бош прокуратураси воқеани тергов қилишни бошлаган.

Дастлабки тахминга кўра, воқеага ёмон об-ҳаво шароити, жумладан кучли шамол сабаб бўлган.