Фарғона коронавирусдан холи ҳудудга айланди

Соғлиқни сақлаш вазирлиги Фарғонада коронавирусга чалинган беморларнинг охиргиси ҳам тузалгани ҳақида маълумот берди.

«Фарғона вилоятида коронавирусга чалинган сўнгги бемор соғайиб, реабилитацияга кузатилди.

Дарҳақиқат, юртимизда коронавирус инфекцияси аниқланган дастлабки кунлардан инфекция тарқалишининг олдини олиш, беморларни самарали даволаш борасида қатъий ва тизимли саъй-ҳаракатлар йўлга қўйилди. Ушбу чора-тадбирлар самараси ўлароқ, мамлакатимизда коронавирус инфекциясидан холи бўлган ҳудудлар сафи кенгайиб бормоқда.

Фарғонада тузалган сўнгги бемор (40 ёшли эркак) ушбу вилоятнинг Олтиариқ туманидан бўлиб, коронивирус инфекциясига чалинган фуқаролар билан мулоқот орқали касалликни юқтириб олган. Шундай қилиб, вилоятдаги фидойи шифокорлар саъй-ҳаракати туфайли коронавирус инфекциясига чалинган 157 нафар беморнинг барчаси бутунлай соғайди», дейилади Соғлиқни сақлаш вазирлиги Жамоатчилик билан алоқалар бўлими хабарида.

Айни пайтда мамлакат бўйлаб коронавирус инфекциясидан бутунлай соғайганлар сони 2077 нафарни ташкил этмоқда.

Эслатиб ўтамиз, бунгача Жиззах, Қашқадарё ва Навоий вилоятлари ҳам коронавирусдан холи ҳудудга айланганди. Аммо 9 май куни вилоятда яна коронавирус аниқлана бошлади, айни вақтда вилоятда 15 нафар бемор бор.

Тайёрлаган: Азиз Қаршиев

#Фарғона #коронавирус