Покистон афғонистонлик қочқинларни қабул қилишни рад этди

Исломобод қочқинларни қабул қилмасликка қарор қилди, деб хабар берди CNN телеканали.

Телеканал юзлаб қочқинлар Спин — Болдак — Чаман чегара-ўтказув пунктидан ўтишга урингани тасвирланган видеолавҳани намойиш этди.

Хабар қилинишича, юзага келган тиқилинч оқибатида бир киши ҳалок бўлган. 

Покистон афғонистонликларни қабул қилишни рад этганига қарамасдан, Спин — Болдак — Чаман ўтказув пункти очиқ турибди. Бу эса Покистонда даволанаётган ёки бу мамлакатда яшашга рухсатномаси бўлганлар ҳамда Қандаҳорда яшовчи афғонларнинг Покистонга киришига рухсат берилгани билан боғлиқ. 

Қайд этилишича, ўтган суткада камида 5 минг нафар афғон фуқаросига Покистонга киришга рухсат берилмаган.

27 август куни Покистон кучлари чегарани ноқонуний кесиб ўтишга уринган афғонистонлик қочқинларга ўқ узиши оқибатида уч киши ҳалок бўлгани хабар қилинганди.