Бухорода фуқаро маст ҳолда ўз янгасини пичоқлади

Ромитан туманида 38 ёшли фуқаро жанжал туфайли маст ҳолда ўз акасининг турмуш ўртоғини пичоқлаган. Бу ҳақда вилоят ИИБ ахборот хизмати хабар бермоқда.

Маълум қилинишича, ҳолат 4 январ куни соат 22:00 ларда содир бўлган. Туманнинг Шўрча маҳалласида яшовчи, 38 ёшли Ҳ.Н. спиртли ичимлик истеъмол қилган ҳолда ўз акасининг турмуш ўртоғи, 1982 йилда туғилган К.Д. билан жанжаллашиб қолган. Жанжал оқибатида у ошхона пичоғи билан янгасига оғир тан жароҳати етказган. Жабрланувчи туман марказий касалхонасига ётқизилган.

Ҳолат юзасидан Ҳ.Н.га нисбатан жиноят иши қўзғатилиб, дастлабки тергов ҳаракатлари олиб борилмоқда.

Вилоят ИИБ раҳбарияти томонидан Шўрча маҳалласида жиноят муҳокамаси ўтказилган. Муҳокамада жиноятнинг келиб чиқиш сабаблари таҳлил қилиниб, келгусида бу каби жиноятларнинг олдини олиш учун масъулларга аниқ кўрсатмалар берилган.