АҚШ Украинага янги ҳарбий ёрдам пакети ажратилишини эълон қилди

Янги маъмурият иш бошлаганидан буён АҚШнинг Украинага берган ёрдами миқдори 9,8 млрд долларга етган.

Фото: Reuters

АҚШ Украинага 1 млрд доллар миқдорида янги ҳарбий ёрдам пакети ажратади, деб маълум қилди Пентагон.

Хабарга кўра, унга Javelin ракета мажмуалари ва HIMARS ракета тизимлари учун ўқ-дорилар ўрин олган.

"High Mobility Artillery Rocket Systems (HIMARS) учун қўшимча ўқ-дорилар. National Advanced Surface-to-Air Missile Systems (NASAMS) учун ўқ-дорилар", - дейилади хабарда.

Шунингдек, янги ёрдам пакетига артиллерия ўқлари, минг дона танкка қарши Javelin ракета мажмуалари, зирҳланган тиббиёт автомобиллари, портловчи моддалар ва дори-дармонлар киритилган.

Маълум қилинишича, янги маъмурият иш бошлаганидан буён АҚШнинг Украинага берган ёрдами миқдори 9,8 млрд долларга, 2014 йилдан буён эса 11,8 млрд долларга етган.