Чехияда нархлар ошишига қарши намойишлар бўлиб ўтди

Прагадаги Вацлав майдонига бир неча минг киши энергия ва озиқ-овқат нархлари ошишига қарши норозилик намойишига чиқди. Митинг Чехия касаба уюшмалари конфедерацияси CMKOS томонидан ҳукуматдан ёрдам сўраб, «Қашшоқликка қарши» шиори остида ўтказилди.

Унинг раиси Йозеф Стредуланинг сўзларига кўра, «биз қиладиган ишимиз йўқлиги учун эмас, балки келажагимиздан қўрқаётганимиз учун келдик». Намойишчилар ҳозирда ойига 644 евро бўлган энг кам иш ҳақини ошириш, шунингдек, кундалик товарлар нархини давлат томонидан тартибга солишни талаб қилишган.

Айни пайтда, Миллий статистика бошқармаси маълумотларига кўра, август ойида Чехияда нархларнинг ўсиши йиллик нисбатда 17,2 фоизни ташкил этди. Фавқулодда чора сифатида, бош вазир Петр Фиала бошчилигидаги ўнг марказчи ҳукумат ноябрь ойи бошидан кучга кирадиган, уй хўжаликлари ва кичик бизнес учун электр энергияси ва газ нархларига чеклов жорий қилди.

Аввалроқ, 29 сентябр куни Прагада ўн минглаб одамлар Россиянинг Украинага қарши урушида «бетарафлик» талаби билан намойиш ўтказган эди – бу акция миллатчилар ва ЕИ танқидчилари томонидан уюштирилган. Намойишчиларнинг асосий талаби Чехия бош вазири Петр Фиала бошчилигидаги ҳукуматнинг истеъфога чиқиши эди, чунки у Европа иттифоқининг Кремлга қарши санкцияларини қўллаб-қувватлайди.

Ундан олдин, 3 сентябр куни Прагада 70 мингга яқин одам ҳукуматдан истеъфога чиқиш, энергия нархини пасайтириш ва Россиянинг Украинага бостириб киришига нейтрал муносабатда бўлишни талаб қилиб намойишга чиққан эди.