Ғафур Ғулом боғи очилиши яна кечикадиган бўлди

Тошкент шаҳрида жойлашган Ғафур Ғулом маданият ва истироҳат боғи 2019 йил март ойида реконструкция ишлари сабаб ёпилган эди. Кейинроқ 2020 йил июл ойида Тошкент шаҳар ҳокимлиги боғни модернизация қилиш ишлари 49 йилга “BMP Smart Decision Private Limited” хориж компаниясига топширилганини маълум қилганди.

Kun.uz Сингапурда рўйхатдан ўтган бу компания таъсисчиси Ўзбекистон фуқароси Шерзод Ҳалимов экани, компаниянинг устав капитали 1000 Сингапур доллари (720 АҚШ доллари атрофида) эканини хабар қилганди.

2021 йил декабр ойида эса пойтахт ҳокими Жаҳонгир Ортиқхўжаев Ғафур Ғулом боғидаги реконструкция кечикиб кетгани учун боғ эгаларини танқид қилган, боғнинг бу инвесторга берилиши масаласи қайта кўриб чиқилишини айтганди.

Узоқ танаффусдан кейин 2022 йилнинг феврал ойида боғ ҳудудини ижарага олган BMP Smart Decision Management таъсисчиси Отабек Мирзажонов боғ шу йилнинг ёзида пойтахтликлар учун очилиши ҳақида маълум қилганди. Таъсисчи боғга 4 млн АҚШ доллари инвестиция киритгани, боғ ичидаги бирор дарахтга дахл қилинмаслиги, барча аттракционлар янгиланишини ва уларнинг 90 фоизи Ўзбекистонга олиб келинганини ҳам қўшимча қилган эди.

Орадан бироз вақт ўтиб, 2022 йилнинг июл ойида Сенатнинг ёшлар, маданият ва спорт масалалари қўмитаси аъзолари боғдаги қурилиш ишларини ўрганиб, боғ 1 сентябрда очилишини эълон қилганди.

Бироқ сўнгги маълумотларга кўра, боғ очилиши яна кечикади. Таъмирчи компания раҳбари Отабек Мирзажоновнинг айтишича, боғнинг очилиш санаси ҳали маълум эмас.

“Ҳозир хориждан келаётган товарларимизни божхона орқали қабул қилиб оляпмиз. Боғни очишга тайёргарлик кўряпмиз. Лекин қачон очилишини аниқ айта олмайман. Октябр ойида очишни режалаштирганмиз”, — деган у.

Компания раҳбари ўринбосари Зафар Мирзаулуғов боғ очилиши кечикишини Украина ва Россиядан келиши кутилаётган товарлар билан боғлаган. Масъул паркнинг 90 фоизи аллақачон тайёрлигини ҳам қўшимча қилган.

“Боғни синов тариқасида очиш октябр ойига режалаштирилган. Декабр ойи охиригача тўлиқ очишга тайёргарлик кўряпмиз”, – деган Зафар Мирзаулуғов.