АҚШ Россия МСК раҳбари Элла Памфиловага қарши санкциялар киритди

Улар орасида Марказий сайлов комиссияси раҳбари Элла Памфилова, унинг ўринбосари Николай Булаев ва МСК котиби Наталя Бударина бор. 

Улар Украинанинг босиб олинган ҳудудларида Россия билан «қўшилиш» бўйича псевдореферендумлар ташкил этишда иштирок этган деб тан олинган. Жами 15 нафар МСК ходимининг исмлари санкциялар рўйхатига қўшилган.

Бундан ташқари, Россия қўшинлари томонидан босиб олинган ҳудудларда Украина фуқароларини «фильтрлаш» тизимини ишлаб чиқишда бевосита иштирок этган Россия президенти маъмурияти ходимлари Николай Ким ва Олег Нестеров ҳам санкциялар остида қолди. 

Рўйхатларга, шунингдек, Донецк вилоятидаги «фильтрлаш»ни назорат қилган «ДХР»нинг «мансабдорлари» Марина Середа ва Алексей Муратов ҳам киритилган.

Санкциялар «Ахмат» батальонининг аъзоси Очур-Суге Монгуш ҳамда АҚШ қийноқлар ва одам ўғирлашда иштирок этган деб ҳисоблаган россиялик аёл Людмила Зайцевани ўз ичига олган.

Бундан олдин Европа Иттифоқи Россияга қарши тўққизинчи санкциялар пакети тафсилотларини эълон қилганди.

Евроиттифоқнинг Россияга қарши санкциялари тўққизинчи пакетига 200 га яқин россиялик компания ва жисмоний шахслар, шунингдек, учта банк киради, деди 7 декабрь, чоршанба куни Еврокомиссия раҳбари Урсула фон дер Ляйен.

Санкцияларни Россия қуролли кучларига алоқадор шахслар ва компаниялар, ҳарбий-саноат комплекси корхоналари, Давлат думаси депутатлари ва Федерация кенгаши аъзолари, шунингдек, вазирлар, губернаторлар ва бошқа сиёсатчиларга нисбатан қўллаш таклиф қилинмоқда, деди фон дер Ляйен. 

«Ушбу рўйхат Россиянинг тинч аҳолига шафқатсиз ва қасддан ракета ҳужумлари, украиналик болаларни Россияга ўғирлаб кетиш ва Украина қишлоқ хўжалиги маҳсулотларини ўғирлаш бўйича асосий рақамларни ўз ичига олади», деди у.

Тўққизинчи санкция пакетига Россиянинг учта банки ҳам киради, улардан бири Бутунроссия минтақавий тараққиёт банкидир, деди Еврокомиссия раҳбари. У яна қайси банклар ҳақида гап кетаётганига аниқлик киритмаган.