Жанубий Корея ҳарбийлари 31 май куни КХДР томонидан учирилган ракета ташувчининг чўкиб кетган қисмини Сариқ денгиздан чиқариб олди, деб хабар берди «Ёнҳап» ахборот агентлиги.
Фото: Reuters
Жанубий Корея Қуролли кучлари штаб бошлиқлари бирлашган қўмитасида маълум қилинишича, сувдан 15 июнь куни кечқурун ҳарбий жосуслик сунъий йўлдошини олиб учган ракетанинг иккинчи босқичи олиб чиқилган.
Қайд этилишича, ракета ташувчи парчаларини олиб чиқиш бўйича операция узоқ давом этган, чунки у бир қатор муаммолар, жумладан, ноқулай сувости шароитлари билан боғлиқ эди.
Топилган ракета ташувчи қолдиқлари Жанубий Корея ҳарбий-денгиз кучларининг Пхёнтекдаги иккинчи флотига етказилади.
Ҳарбийлар ракетанинг бошқа қисмларини, жумладан, учинчи босқич ва эҳтимолий сунъий йўлдошни қидиришни давом эттирмоқда.
Жанубий Корея ва АҚШ ҳодиса юзасидан биргаликда тергов ўтказишни режалаштирмоқда.
