Суд ислоҳоти доирасидаги биринчи қонун лойиҳаси қабул қилинганидан икки кун ўтиб, минглаб одамлар яна Тел-Авив кўчаларига чиқди.
Исроилда 27 июль, пайшанба куни суд ислоҳотига қарши кўча намойишлари қайта бошланди, ислоҳотнинг биринчи қисми бир неча кун аввал мамлакат парламенти томонидан маъқулланганди. Минглаб одамлар Тел-Авивдаги ҳукумат бинолари олдида тўпланди.
Исроил телевидениесининг 13-каналига кўра, намойишчилар демократияни қўллаб-қувватловчи шиорлар айтиб, мамлакат байроқларини кўтарган. Шу билан бирга, полиция 800 га яқин ходимни ҳукумат кварталига олиб келиб, акцияга олдиндан тайёргарлик кўрди. Бундан ташқари, мавзеда назорат-ўтказиш пунктлари ва сим тўсиқлар ўрнатилди.
Суд ислоҳотига қарши норозилик намойишлари икки кунлик сукутдан кейин яна бошланди. Ислоҳот бўйича биринчи қонун лойиҳаси 24 июль куни Исроил парламенти (Кнессет) томонидан маъқулланган ва шу куни норозиликларга сабаб бўлган эди. Полиция таёқлар, кўздан ёш оқизувчи газ ва сув пуркагичлардан фойдаланган ҳолда шафқатсиз қўлга олишлар билан жавоб берди, деб ёзади AFP ахборот агентлиги. 13-канал қайд этишича, ҳуқуқ-тартибот идоралари ходимлари махсус воситалардан фойдаланганлик айбловларини рад этди.
24 июль куни Кнессет томонидан қабул қилинган суд ислоҳотлари пакетидаги биринчи қонун лойиҳаси Олий суднинг ҳукумат томонидан қабул қилинган қарорларни бекор қилиш ваколатини чеклайди. Мухолифатдаги парламентарийлар қонун лойиҳаси бўйича овоз беришни бойкот қилди, ҳукмрон коалициянинг 64 депутати уни ёқлаб чиқди. Ҳужжатни қабул қилиш учун бу етарли бўлди. Ислоҳот танқидчилари фикрича, тузатишлар ҳукуматни назорат қилишнинг энг самарали механизмларидан бирини олиб ташлаш орқали ҳокимиятни суиистеъмол қилиш имкониятларини яратади.
