ОАВ: Россияда 200 га яқин дори сотуви тўхтатилиши мумкин

«Холод» нашрига кўра, Россия Соғлиқни сақлаш вазирлиги тиббиёт муассасаларини РФда кўплаб дори-дармонлар, жумладан, антибиотиклар ишлаб чиқариш ва импорт қилиш тўхтатилгани ҳақида хабардор этган.

Фото: Depositphotos

Россияликлар 200 га яқин дори воситаларидан фойдаланиш имкониятидан маҳрум бўлиши мумкин. Соғлиқни сақлаш вазирлигининг ўз бўйсунувидаги тиббиёт муассасаларига йўллаган мактубида Россияда ишлаб чиқарилиши ва импорт қилиниши тўхтатиладиган 196 та хорижий дори воситалари санаб ўтилган, деб ёзади 18 август, жума куни «Холод».

Унга кўра, ушбу рўйхатга баъзи антибиотиклар, ОИВ инфекцияси, саратон, эпилепсия, Паркинсон касаллиги ва руҳий касалликларни даволаш учун мўлжалланган дорилар киритилган. Рўйхатга, шунингдек, анестетик ва антипиретик воситалар, йўтал, қизамиқ, дифтерия, кўкйўтал, қизилча ва бошқа инфекцияларга қарши импорт қилинаётган дорилар ҳамда вакциналар киради.

Замонавий антибиотикларнинг йўқ бўлиб кетиши - айниқса ташвишли

Нашр таъкидлашича, энг катта ташвиш Россияда баъзи антибиотикларнинг йўқолиши билан боғлиқ. Соғлиқни сақлаш вазирлигининг рўйхатига 14 та антибиотиклар, антибактериал ва антивирал препаратлар киради.

Рўйхатда келтирилган бир қатор дори воситалари эскирган ёки рус аналогларига эга. Айни пайтда, россиялик женериклар импорт қилинган асл дори воситаларидан сифат жиҳатидан паст ва кўпроқ ножўя таъсирларга эга, дея таъкидлайди нашр шифокорларга таяниб.

«Холод» 27 июл куни Соғлиқни сақлаш вазирлиги томонидан юборилган хатни икки манбадан олганини ва уни идора электрон ҳужжат айланиш тизимида рўйхатдан ўтганини текширганини таъкидлайди.