Исроил ҳарбий амалиётнинг иккинчи босқичи бошланганини эълон қилди

Унда эътибор ҲАМАС ҳаракати инфратузилмасини йўқ қилиш ва гаровга олинганларни озод қилишга қаратилиши айтилди.

Фото: Maya Alleruzzo/Pool via REUTERS

Исроил бош вазири Бинямин Нетаняху Ғазо секторидаги ҳарбий амалиётнинг иккинчи босқичи бошланганини эълон қилди, унинг мақсади Фаластиннинг ҲАМАС ҳаракати инфратузилмасини йўқ қилиш ва гаровга олинганларни озод қилишдир. Унинг матбуот анжуманидаги сўзларини The Times of Israel келтирди.

Нетаняхунинг таъкидлашича, жанговар ҳаракатларнинг иккинчи босқичи 27 октябр куни кечқурун Ғазо секторига янги қўшинларнинг киритилиши билан бошланган.

«Душман ҳудудида жанг қилаётган қўмондонларимиз ва аскарларимиз халқ ва миллий раҳбарият улар билан бирга эканини билади. Улар яҳудий халқи учун, қўшимча қиламан, бутун инсоният учун бу золимларни таг-туги билан йўқотишга тайёр. Биз эсда тутамиз ва курашамиз. Уларнинг мақсади ягона - қонхўр душманни енгиш ва ўз заминимизда яшашимизни таъминлаш», деди Нетаняху.

Бош вазир, шунингдек, Ғарб ва араб мамлакатларидаги иттифоқчилар ҲАМАС билан уруш мақсадларини тушунишига ва Исроилга ғалаба тилашига ишонч билдирди.

Нетаняху сўзларига кўра, қуруқлик амалиётини ўтказиш ҳақидаги қарор ҳарбий кабинет ва хавфсизлик кабинети томонидан бир овоздан қабул қилинган.

Аввалроқ, Нетаняху ҲАМАС ҳаракатини йўқ қилишга ваъда берган эди.

#Исроил #Фаластин #Ғазо #Бинямин Нетаняху

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.