Британияда дунёдаги энг кекса эркак вафот этди

Дунёдаги энг кекса эркак дея тан олинган Жон Алфред Тиннисвуд Буюк Британиядаги қариялар уйида 112 ёшида вафот этди. Бу ҳақда Тиннисвуднинг оиласига таяниб Mirror хабар берди.

Тиннисвуд 1912 йил 26 августда дунёга келган — ўша йили «Титаник» чўкиб кетган ва Хитойдаги Цин сулоласининг 268 йиллик бошқаруви якунига етган. Эркак кўплаб технологик ютуқларни бошдан ўтказган ва у кўпинча «самолётлар ҳаракатланиш воситасига айланганидан кейин дунё кичрайди», дерди.

2024 йил апрелда Жон Алфред Тиннисвуд дунёдаги энг кекса эркак сифатида тан олинган ва Гиннеснинг рекордлар китобига киритилган. Ўшанда Тиннисвуд 111 ёшда эди, августда эса у ўзининг 112 ёшини нишонлаган. Ундан бир нафар қиз, тўрт нафар набира ва уч эвара қолди.

Тиннисвудга қадар венесуэлалик Хуан Винсенте Перес Мора дунёдаги энг кекса эркак дея ҳисоблаб келинган. У жорий йилнинг апрелида 114 ёшида вафот этганди.

Сентябр ўрталарида япониялик аёл дунёдаги энг кекса одам деб топилган ва 116 ёшдан ошган аёлга Гиннеснинг рекордлар китоби сертификати топширилган эди.