Хитой «Ҳонгконг ишига алоқадор» АҚШ фуқароларига виза беришни чеклади

Хитой ташқи ишлар вазирлиги «Ҳонгконг билан боғлиқ масалаларда ноҳақ ҳаракатларни амалга оширган» Америка фуқароларига виза чекловларини жорий этади. Бу ҳақда ТИВ матбуот котиби Мао Нин маълум қилди.

Қайд этилишича, матбуот анжуманида Shenzhen TV журналистлари АҚШ томонидан Ҳонгконг миллий хавфсизлиги ҳимояси тўғрисидаги қонуннинг бажарилишини назорат қилаётганларга жорий этилган виза чекловларига қандай жавоб қайтарилиши тўғрисида савол берган. ХХР ТИВ матбуот котиби Хитой аллақачон АҚШга «ўзининг расмий позициясини билдирганини» маълум қилди.

Маонинг сўзларига кўра, АҚШ Ҳонгконг билан боғлиқ муаммолардан фойдаланиб, «Хитой расмийларига тўсатдан виза чекловларини киритган, бу Хитойнинг ички ишларига қўпол аралашиш ва халқаро ҳуқуқ тамойиллари ҳамда халқаро муносабатларнинг асосий меъёрларини жиддий бузишдир». Матбуот котиби Ҳонгконг Хитойнинг бир қисми экани ва Ҳонгконг иши Хитойнинг ички иши эканини таъкидлаб ўтган. «Биз АҚШни Хитой суверенитети, Ҳонконг қонунларини ҳурмат қилишга ва ҳар қандай шаклда Ҳонгконг ишига аралашишни тўхтатишга чақирамиз», — дейди у.

АҚШ томонидан айрим ҳонконглик амалдорларга виза чекловларининг жорий этилишига мухолифатнинг 45 нафар вакили миллий хавфсизлик тўғрисидаги қонунни бузгани учун қамалгани сабаб бўлди. Ҳукуматни ағдаришга тил бириктирганликда айбланган мухолифатчилар тўрт йилдан ўн йилгача қамоқ жазосига ҳукм қилинган.