Электрлаштириладиган хонадонларга имтиёзли тариф жорий этилади — Мирзамаҳмудов

Ўзбекистонда табиий газга уланмаган, электрлаштириладиган хонадонлар учун электр энергиясининг имтиёзли тарифи жорий этилади. Бу ҳақда президент ҳузуридаги йиғилишдан кейин энергетика вазири Жўрабек Мирзамаҳмудов маълум қилди.

“Электр энергияси истеъмоли ортиши билан бирга аҳоли, электр транспортлари ва бошқа йўналишларда, айниқса, электрлаштириладиган хонадонларга имтиёзли тарифлар қилиб бериш бўйича механизмлар бўйича топшириқлар бердилар”, – деди вазир “Ўзбекистон 24” телеканалига берган интервюсида.

Унинг сўзларига кўра, қурилиш ва энергетика соҳаларидаги лойиҳаларда маҳаллий маҳсулотлардан фойдаланишга асосий эътибор қаратилади. Энергетика вазирлиги қошида Энергетика институти ташкил этилади.

“Барча топшириқлар бўйича қисқа муддатларда дастур лойиҳаси киритилади”, – деди Мирзамаҳмудов.

Аввалроқ Kun.uz жорий йилдан бошлаб янги қуриладиган кўп квартирали уйлар табиий газ тармоғига уланмаслиги ҳақида хабар берганди.

Эслатиб ўтамиз, Жўрабек Мирзамаҳмудов 2024 йил октябр ойидаги интервюсида табиий газ билан таъминланмаган ҳудудлардаги хонадонлар учун электр энергиясига 50 фоизлик чегирма берилиши, бу тартиб 1 январдан жорий қилиниши мумкинлигини айтганди. Лекин бу амалга ошмади.