Аляскада бортида 10 киши бўлган самолёт бедарак йўқолди

Самолёт ҳавога кўтарилганидан 40 дақиқа ўтиб радарлардан йўқолган. У охирги маротаба қайд этилган жойга қутқарув самолёти юборилган, аммо ноқулай об-ҳаво қидирув ишларига халақит бермоқда.

Фото: Bering Air

Bering Air авиакомпаниясининг бортида ўн киши бўлган самолёти Аляска устидан учиб ўтаётганида бедарак йўқолди, деб хабар беради CNN.

Қутқарувчилар Уналаклитадан Номга учаётган самолётни қидириш билан шуғулланмоқда. У билан алоқа 6 феврал куни маҳаллий вақт билан 16:00 ларда йўқолган.

Bering Air авиакомпаниясининг Cessna 208 Caravan самолёти соат 14:37 да ҳавога кўтарилган. Одатда у ердан Номгача бўлган парвоз бир соатни ташкил этади. Самолёт учишни бошлаганидан тахминан 40 дақиқа ўтиб, у билан алоқа узилган, ҳаво кемаси радарлардан йўқолиб қолган. Бу вақтда самолёт Нортон-Саунд кўрфази устидан учиб ўтаётган бўлган.

Самолёт бедарак йўқолганидан кейин у охирги маротаба қайд этилган жойга қутқарув самолёти юборилган, соҳилни қўриқлаш хизмати бўлинмалари кўрфаз соҳилларида қидирув ишларини бошлаган. Қор ва музли ёмғир туфайли кўрувчанлик ёмонлашган, шу боис қидирув ишлари қийинлашган.

Аввалроқ АҚШда беморни олиб кетаётган кичик тиббий самолёт уйлар устига қулаб тушганди. Филаделфия шаҳрида қулаган кичик тиббий самолёт Мексикага кетаётганди. Унинг бортида тўрт нафар экипаж аъзоси, бир бемор ва унинг онаси – жами 6 киши бўлган, улардан ҳеч бири омон қолмаган.

#Аляска #самолёт