Хитойлик ҳакерлар Белгия махсус хизматлари маълумотларини қўлга киритган — ОАВ

Хитойлик ҳакерлар 2021-2023 йиллар давомида Белгия Давлат хавфсизлик хизматининг (VSSE) маълумотларини ўғирлаб келгани маълум бўлди, деб ёзмоқда Se Coir нашри.

Белгия Давлат хавфсизлик хизматининг ички тергови маълумотларига кўра, идорага келиб тушган ҳар ўнта электрон мактубнинг биттаси Хитойга боғлиқ ҳакерлар томонидан қўлга киритилган.

Таъкидланишича, ҳакерлар Американинг Barracuda компаниясининг дастурий таъминотидаги заифликдан фойдаланган.

Нашр манбаларига кўра, бу VSSE дуч келган «хавфсизлик соҳасидаги энг жиддий можаро» ҳисобланади. Хитойлик ҳакерлар томонидан қўлга киритилган маълумотларда идора ходимларининг қарийб ярмининг маълумотлари, жумладан, шахсни тасдиқловчи маълумотлар ҳам бўлиши мумкин. Шу билан бирга, ички тергов ҳужум айнан кимларга қаратилганини аниқлай олмаган.

VSSE раҳбарияти жиноят иши қўзғатиш бўйича ариза берган ва қатор чораларни кўрган, жумладан, киберҳужумлар даврида шахсий маълумотларини топширган ходимларни ўз ҳужжатларини янгилашга чақирган.

Аввалроқ россиялик ҳакерлар бутун дунё бўйлаб вазирлар ва амалдорлар, шунингдек, Украинага ёрдам кўрсатиш билан шуғулланувчи таҳлил марказлари ҳамда ташкилотлар ходимларининг WhatsAppʼдаги аккаунтларига киришга урингани тўғрисида хабар берилганди.