Россиядаги ЙТҲда уч нафар ўзбекистонлик ҳалок бўлди

Ўзбекистоннинг Қозон шаҳридаги бош консуллиги феврал ойида Перм ўлкасининг Оса районида содир бўлган ЙТҲ юзасидан маълумот берди.

22 феврал куни куни тонгда Россиянинг Перм ўлкасида рўй берган ЙТҲда Ўзбекистоннинг 3 нафар фуқароси ҳалок бўлиб, яна 3 киши турли жароҳатлар билан шифохонага жойлаштирилган. Бу ҳақда Ўзбекистоннинг Қозон шаҳридаги бош консулхонаси хабар берди.

ЙТҲ Оса районида «Оса — Чернушка» трассасида давлат рақами Ўзбекистонники бўлган Lada Largus ва SIMAZ русумли автобус иштирокида рўй берган. Енгил автомобилдагиларнинг икки нафари воқеа жойида, учинчиси шифохонада вафот этган.

Яна уч нафар ўзбекистонлик турли даражадаги тан жароҳатлари билан Перм ўлкасининг Оса марказий шифохонасига жойлаштирилган ва ҳозирда тиббий муолажалар олмоқда.

Қайд этилишича, ҳолат бош консулхона назоратига олинган бўлиб, вафот этганларнинг жасадларини тезкор равишда қайтариш ишлари якунланган ва жабрланганларга тиббий муолажа кўрсатиб келинмоқда.

Перм ўлкаси давлат автоинспекцияси матбуот хизмати маълумотига кўра, Lada Largus автомобили иккинчи даражали йўлдан чиқаётганда асосий йўлдаги автобусни ўтказиб юбормаган.