Белградда намойишчилар кўчаларни тўсиб, баррикадалар қурмоқда

28 июн куни бўлиб ўтган намойишдан сўнг юзлаб талабалар ҳибсга олишларга норозилик билдириш учун Сербия пойтахти кўчаларини тўсиб қўйди. Радикал намойишчилар полиция билан тўқнашди. 77 киши ушланган.

Фото: Zorana Jevtic/REUTERS

Белграддаги намойишчилар 30 июн, душанбага ўтар кечаси бир қанча муҳим кўчаларни тўсиб, баррикадалар ўрнатди.Сербиянинг «Блиц» газетаси пойтахт кўчалари ва чорраҳаларида юзлаб одамлар, чодирлар лагерлари ва чиқинди қутиларидан ясалган баррикадалар кўриниб турган кадрларни чоп этмоқда. Газетанинг ёзишича, Сава дарёси устидаги Газела кўприги ҳам тўсиб қўйилган. Худди шундай акциялар Сербиянинг бошқа шаҳарларида ҳам бўлиб ўтмоқда.

«Блиц» нашрининг ёзишича, полиция ва коммунал хизматлар 30 июн тонгига яқин транспорт қатновини тиклаш ва тўсиқларни бартараф этишга уриниб кўриши кутилганди. Сербия бош вазири ўринбосари ва ички ишлар вазири Ивица Дачичнинг айтишича, ҳукумат йўлларнинг тўсиб қўйилишили кузатмоқда ва тинчликка чақиряпти.

Американинг Associated Press агентлиги 30 июнга ўтар кечаси акция иштирокчилари сонини бир неча мингга баҳолади.

Акция талабаларнинг «Блокада» норозилик гуруҳи томонидан амалга оширилмоқда. Ижтимоий тармоқларда унга юз минглаб одамлар обуна бўлган. У Белград харитасини эълон қилган бўлиб, унда одамлар келиб кўчаларни тўсиб қўйишга чақирилган нуқталар кўрсатилган.

Гуруҳ 28 июн оқшомида полиция билан тўқнашувда бир неча талаба ҳибсга олинганидан норози. Жами 77 киши ушланган, 38 нафари ҳибсга олинган. 70 нафар фуқаро, жумладан 48 нафар полициячи тан жароҳати олди, дея хабар беради Сербия ИИВ.

Президент Александр Вучич тартибсизликларнинг радикал иштирокчиларини «террорчилар» деб атади ва митингларда қатнашаётган Белград университети ректори Владан Жокични танқид қилди.