Жанубий кореялик экспертлар КХДР янги «махфий қуроли» ҳақида билиб олди

КХДР «махфий қуроли» «Хвасон-20» қитъалараро баллистик ракетаси ёки унинг модификацияси, шунингдек, бир нечта каллакли қитъалараро баллистик ракеталар, гипертовушли ракеталар ва атом сувости кемалари бўлиши мумкин. Бу ҳақда жанубий кореялик экспертларга иқтибос келтирган ҳолда News1 агентлиги хабар берди.

Бир кун аввал Шимолий Корея етакчиси Ким Чен Ин мамлакатда «махфий қурол» ишлаб чиқилгани ва янги эсминецлар қурилгани, бу эса денгизнинг қудратли давлатига айланиш йўлида «муҳим қадам» қўйилганини англатишини маълум қилганди. Айни пайтда Шимолий Корея Пхеняннинг Мирим аэродроми ҳудудида кенг кўламли ҳарбий машғулотлар ўтказмоқда.

«Ким Чен Ин шу пайтгача асосий қуролларни ишлаб чиқиш жараёнини шахсан кузатган ва «махфий қурол» ибораси илгари тилга олинган тизимнинг маромига етганини англатиши мумкин», деди Жанубий Корея Миллий мудофаа ва хавфсизлик форуми котиби Ом Хё Сик.

Шунингдек, Жанубий Кореяда Пхенян аллақачон эълон қилинган «Хвасон-20»ни эмас, балки «ноёб нарса» - «қудрати ва вазифасидан қатъи назар, тасаввур қилиш қийин бўлган» тизимни тайёрлаганини истисно қилишмайди. Эҳтимол, бу қуроллар 10 октябр куни - КХДР Меҳнат партияси ташкил топганининг 80 йиллиги шарафига ўтказиладиган ҳарбий парадда намойиш этилади, дейилади мақолада.