Зеленский уруш тугаса, сайловда қатнашмасликка тайёрлигини айтди

Украина президенти Володимир Зеленский Американинг Axios нашрига берган интервюсида агар Россия билан урушни тугатиш мумкин бўлса, иккинчи муддатга сайланмасликка тайёрлигини айтди.

«Агар биз россияликлар билан урушни якунласак, мен [сайловларга] бормасликка тайёрман, чунки сайловлар мен учун мақсад эмас. Мен бу жуда мураккаб даврда юртим билан бирга бўлишни, унга ёрдам беришни жуда хоҳлардим. Менинг мақсадим – урушни тугатиш», – деди Украина президенти.

Зеленский 2019 йил май ойидан бери президентлик қилмоқда. Унинг биринчи президентлик муддати 2024 йил май ойида тугаши керак эди, бироқ ҳарбий ҳолат шароитида Украина қонунчилиги янги сайловлар ўтказишни тақиқлайди, шунинг учун Зеленскийнинг биринчи муддати автоматик равишда узайтирилди. Бу Россия расмийларига Украина президентининг «нолегитимлиги»ни эълон қилиш учун сабаб бўлди.

Шу билан бирга, Украинанинг ўзида, ҳатто Зеленскийнинг сиёсий мухолифлари орасида ҳам у ҳарбий ҳолат бекор қилинмагунча президент бўлиб қолиши кераклиги ҳақида консенсус мавжуд.

Зеленскийнинг ўзи ҳам уруш тугаб, ҳарбий ҳолат бекор қилинганидан кейин президентлик сайловларини ўтказиш муҳимлиги ҳақида бир неча бор гапирган. У Axios’га берган интервюсида уруш бутунлай тугамасдан, Россия билан узоқ муддатли сулҳ тузилган тақдирда ҳам сайловлар тезроқ ўтказилишига эришишини айтди.

Охирги сўровлар кўрсатишича, агар ҳозир сайлов ўтказилса, Володимир Зеленский сайловчиларнинг энг кўп қўллаб-қувватлашига эга бўлади. «Рейтинг» социологик марказининг август ойидаги тадқиқотига кўра, украинларнинг 35,2 фоизи унга, 25,3 фоизи эса унинг асосий потенциал рақиби, Украина қуролли кучларининг собиқ бош қўмондони Валерий Залужнийга овоз беришга тайёр. Шу билан бирга, умумий ишонч даражаси бўйича Зеленский Залужнийдан ортда қолмоқда.

Зеленский яна нималар деди?

Зеленский интервюсида агар Россия урушни тўхтатмаса, Кремлдаги амалдорлар энг яқин бомбапанагоҳ қаерда эканини билиб қўйишлари кераклигини айтди.

Украина президентининг сўзларига кўра, яқинда Доналд Трамп билан учрашуви чоғида у Киев Россия зарбаларига «бирга-бир» принципи бўйича жавоб бериши кераклиги масаласини кўтарган. Зеленскийнинг таъкидлашича, Америка президенти Россиянинг энергетика инфратузилмаси объектлари ва ҳарбий заводларига зарбалар беришни қўллаб-қувватлайди.

Унинг сўзларига кўра, у Трампдан Владимир Путинни музокаралар столига ўтиришга мажбур қиладиган янги узоқ масофали қуролларни тақдим этишни сўраган. Зеленский Киев Вашингтондан айнан қандай қурол сўраётганига аниқлик киритмади, бироқ агар уни оладиган бўлса, ундан фойдаланишини қўшимча қилди.

Шу билан бирга, Зеленский Украина тинч аҳолини бомбардимон қилмоқчи эмаслигини, чунки «украинлар террорчи эмаслиги»ни таъкидлади. Аммо у Кремл каби Россия ҳукумати объектлари Киев учун нишонга айланиши мумкинлигини билдирди.

«Улар бомбапанагоҳлар қаерда жойлашганини билишлари керак.  Агар улар урушни тўхтатишмаса, бу уларга барибир керак бўлади. Улар биз доимо жавоб беришимизни ҳисоба олишлари керак», – деди Зеленский Кремл расмийлари ҳақида.

Россия Хавфсизлик кенгаши раҳбари ўринбосари Дмитрий Медведев аллақачон ижтимоий тармоқларда Зеленскийнинг бу сўзларига муносабат билдирган. «У ярамас бошқа нарсани билиши керак: Россия бомбапанагоҳ ёрдам бермайдиган қуролларни қўллаши мумкин. Ва америкаликлар буни ёдда тутишлари керак», – деб ёзди у.