SpaceX Starship'нинг 11-синовини муваффақиятли якунлади

Starship космик кемаси Ҳинд океанида, Super Heavy кучайтиргичи эса Мексика кўрфазига қўнди. Starlink сунъий йўлдошининг бир қатор макетлари орбитага чиқарилди. Ой ва Марсга миссиялар режалаштирилган.

Фото: Reuters

Американинг SpaceX компанияси Ҳинд океанига қўнган тарихдаги энг катта Starship космик кемаси прототипи бўлган ракета ташувчининг 11-синовини муваффақиятли якунлади. Бу ҳақда корпорация 13 октябр, душанба куни X ижтимоий платформасида маълум қилди.

«Сувга қўниш тасдиқланди! Starship'нинг ўн биринчи синов парвозини муваффақиятли якунлагани билан бутун SpaceX жамоасини табриклаймиз!» - дейилади постда.

Бу компания Ой ва Марсга миссиялар учун қўшимча функциялар билан синовдан ўтказишни бошлашдан олдинги охирги парвоз эди.

Кема прототипи маҳаллий вақт билан соат 18:24 (Тошкент вақти билан 4:24)да Техасдаги Starbase учириш майдонидан кўтарилди. Starship'ни коинотга учиргач, Super Heavy кучайтиргичи ҳавога кўтарилганидан тахминан 10 дақиқа ўтиб Мексика кўрфазига қайтиб келди. Юқори поғона Ҳинд океанига тушиб, аввалроқ Starlink сунъий йўлдошининг бир қатор макетларини орбитага олиб чиққан.