Эрон футбол бўйича жаҳон чемпионати қуръасини бойкот қилмоқчи

Эрон футбол федерацияси (ЭФФ) делегацияси 5 декабр куни АҚШ пойтахти Вашингтонда бўлиб ўтадиган жаҳон чемпионати қуръасида иштирок этмоқчи эмас. Аввалроқ федерация раҳбари Маҳдий Тожга мамлакатга киришга рухсат берилмаган эди. Бу ҳақда Iran International ёзди.

Эрон делегацияси ЖЧ-2026 йўлланмасини қўлга киритган мамлакат вакили сифатида қуръа ташлаш маросимида иштирок этиши керак эди. Бироқ, ОАВ маълумотларига кўра, делегациянинг бир неча аъзосига, жумладан ЭФФ раҳбари Маҳдий Тожга Америка визаси берилмаган. У бундай қарорни сиёсий деб атади.

«Биз ФИФАга қабул қилинган қарорларнинг спортга ҳеч қандай алоқаси йўқлиги ва Эрон делегацияси аъзолари жаҳон чемпионати қуръасида иштирок этмаслигини маълум қилдик. Биз ФИФА раҳбари жаноб Инфантинога бу фақат сиёсий позиция эканини ва ФИФА бундай хатти-ҳаракатлардан тийилишни талаб қилиши кераклигини айтдик», деди Тож.

Қайд этилишича, делегациянинг 4 нафар аъзоси, жумладан, Эрон миллий жамоаси бош мураббийи Амир Ғалиноий виза олган.

Бироқ ЭФФ вакили Амир Маҳдий Алавий мамлакат делегациясига тўлиқ таркибда виза берилмаса, қуръа маросимидан воз кечишини маълум қилди.

ФИФА ва АҚШ Давлат департаменти ҳозирча вазиятга изоҳ бермади.

Эрон ташқи ишлар вазири Аббос Ароқчи бу масалани назорат остида ушлаб турганини маълум қилди.

Таъкидланишича, ФИФА Ижро қўмитаси аъзоси бўлган Тож катта эҳтимол билан ФИФА орқали виза олади.

Эслатиб ўтамиз, 5 декабр куни Вашингтонда жаҳон чемпионати финал босқичига қуръа ташлаш маросими бўлиб ўтади.