Солиқ рўйхатидан ўтмаган хорижий онлайн платформалар блокланиши мумкин

2026 йил 1 январдан Ўзбекистонда солиқ органларида рўйхатдан ўтмай фаолият юритаётган хорижий онлайн компанияларга чекловлар қўлланади. Уларга рўйхатдан ўтиш учун 30 кун берилади.

Фото: iStock

Кейинги йил 1 январдан бошлаб Ўзбекистонда солиқ органида рўйхатдан ўтмасдан фуқароларга электрон тарзда хизмат кўрсатувчи ёки товарлар сотадиган хорижий компаниялар ўз фаолиятида чекловларга дуч келиши мумкин. Бу президентнинг 10 декабрдаги «Нақдсиз ҳисоб-китобларни оммалаштириш ва яширин иқтисодиёт улушини қисқартиришга қаратилган қўшимча чора-тадбирлар тўғрисида»ги фармонида кўзда тутилган.

Жисмоний шахсларга электрон шаклда хизматлар кўрсатувчи ва товарлар сотувчи чет эл юридик шахслари солиқ органида рўйхатдан ўтмасдан фаолият юритаётгани аниқланганда, уларга рўйхатдан ўтиш тўғрисида хабарнома юборилади. Агар компания 30 кун ичида бу талабларга жавоб бермаса, унинг мамлакатдаги фаолияти чекланиши мумкин.

Солиқ қўмитасининг Gazetaʼга тушунтиришича, қўмита номидан хорижий юридик шахсга расмий хат юборилади. Агар 30 кун ичида жавоб олинмаса ёки ариза рад этилса, Солиқ қўмитаси электрон тижоратни тартибга солувчи орган — Истиқболли лойиҳалар миллий агентлиги (ИЛМА) билан боғланади. Агентлик, ўз навбатида, компаниянинг Ўзбекистондаги фаолиятини чеклаш ёки чекламаслик тўғрисида қарор қабул қилиши мумкин бўлади.

Бундан ташқари, 1 мартга қадар солиқ органлари жисмоний шахслар — Ўзбекистон фуқаролари томонидан хорижий юридик шахсларга юборилган пул операциялари бўйича эгасизлантирилган маълумотларни олиш тартибини ишлаб чиқиш режалаштирилган.

Тайёрлаган: Достон Аҳроров

#солиқ #онлайн платформа