«Барса» қишки чемпион, «МЮ» яна ютқазди. Кун ўйинлари

Англия: Роджерснинг бенефиси

«Астон Вилла» – «Манчестер Юнайтед» 2:1
Голлар: Роджерс, 45 (1:0). Куня, 45+3 (1:1). Роджерс, 58 (2:1)
«Астон Вилла»: Э. Мартинес, Линделеф, Конса, Матсен (Дин, 75), Кэш, Онана (Буэндия, 84), Камара (Богард, 88), Тилеманс, Роджерс, Макгинн (Гессан, 84), Уоткинс (Мален, 75)
«Манчестер Юнайтед»: Ламменс, Ҳевен, Шоу, Йоро (Лэйси, 85), Бруну Фернандеш (Л. Мартинес, 46), Угарте (Флетчер, 73), Доргу, Далот, Маунт, Куня, Шешко (Зиркзе, 73)
Огоҳлантиришлар: Богард, 90 – Угарте, 69. Далот, 72

Бирмингҳэмдаги ўйинда Рубен Аморим Каземиронинг дисквалификацияси, Де Лиҳтнинг жароҳати, шунингдек Мбеумо, Мазравий ва Диалло Африка кубогига кетгани туфайли «МЮ» бошланғич таркибини қайтадан тузишига тўғри келди. Бу АПЛга мослашиши оғир кечаётган Шешко учун бошланғич таркибга йўл очди ва айнан словенияликнинг пасидан кейин Матеус Куня тезкор гол билан ҳисобни очиши мумкин эди. Аммо меҳмонлар кучли стартдан кейин бироз ортга чекинди. Биринчи бўлим голсиз дурангга қараб кетаётганида эса Роджерс яна бир бор катта саҳнага чиқди. У чап қанотда Макгиннинг узун узатмасини қабул қилиб олиб, марказга кўчди ва тўпни олис бурчакка йўналтирди, дарвозабон Ламменс эса жойидан қимирлашга улгурмади.

«Астон Вилла» ғалабали ҳисоб билан танаффусга чиқишга тайёрланаётганди, аммо қўшимча дақиқаларда Кэш кутилмаганда Доргунинг прессинги остида тўп йўқотди ва Матеус Куня анчагина ўткир бурчакдан ажойиб зарба йўллади. Сўнгги уч дақиқаликда мухлислар ундан олдинги 45 дақиқаликдагига қараганда кўпроқ воқеаларга гувоҳ бўлишди, «МЮ» эса руҳий жиҳатдан ўтган мавсумдагига қараганда анча ўзгарганини намойиш этди.

Аммо жамоалар танаффусдан қайтганида Бруну Фернандеш жароҳат олгани маълум бўлди ва бу Аморим учун навбатдаги бошоғриқ. Мезбонлар эса яна бир бор Роджерснинг саъй-ҳаракатлари билан дарвозани ишғол этиб, АПЛда йигирмата гол урган энг ёш футболчига (23 ёшу 148 кунлик) айланди.

Шубҳасиз, Морган – Унаи Эмери жамоасидаги энг ёрқин футболчи. Испаниялик мутахассис икки йил муқаддам шахсан ўзи чемпионшипдаги «Мидлсборо»дан олиб келган Роджерс олдинги турда «Вест Ҳэм» дарвозасига ҳам икки гол урганди, бунгача «Вилла» футболчилари 1998 йилдан буён (ўшанда Дион Даблин кетма-кет уч ўйинда иккитадан гол урган) қаторасига икки турда дубл қайд этмаган. Меҳмонлар сафида эса Роджерс топилмади, Куня бунга яқин келганди, аммо унинг Доргунинг навбатдаги узатмасидан кейин дарвозабон ҳудудида туриб бошда йўллаган зарбаси хато кетди. Натижада «қизил иблислар» очколар сони бўйича «Челси» ва «Ливерпул»га етиб олиш имкониятини қўлдан бой берди, учинчи ўринда мустаҳкамланиб олган «Вилла» эса тўртинчи ўрин билан орадаги фарқни олти очкога етказди, пешқадам «Арсенал» билан уч очколик фарқ сақланиб қолди.

Испания: Симеоне – футболчи алмаштиришлар қироли

«Жирона» – «Атлетико» 0:3
Голлар: Коке, 13 (0:1). Галлаҳер, 38 (0:2). Гризманн, 90+2 (0:3)
«Жирона»: Гассанига, Витор Рейс, Блинд, Морено, Франсес (Ринкон, 61), Мартинес (Ҳил, 61), Витсел, Мартин (Лемар, 71), Рока (Асприля, 46), Циганков (Солис, 71), Ванат
«Атлетико»: Облак, Ганцко, Пубил, Руджери, Лиоренте (Гризманн, 78), Коке, Барриос, Гонсалес (Галлаҳер, 28, Ле Норман, 77), Симеоне, Серлот (Распадори, 83), Алварес (Алмада, 77)
Огоҳлантиришлар: Мартинес, 57. Лемар, 84

«Атлетико» ўз одатига кўра ўйин дебютида рақиб жарима майдонидаги Сёрлот учун беҳисоб узатмалар амалга оширди ва бу ўз самарасини берди. Шундай узатмалардан кейин жарима майдонидан қайтиб чиққан тўпни мадридликлар сардори Коке қойилмақом траектория бўйлаб юқори бурчакка йўналтирди. Фахрий футболчи қаторасига иккинчи турда дарвоза тўрини ишғол этмоқда ва «матрасчилар» футболкасида урган голлари сонини 50 тага етказди (708 ўйинда). У клуб тарихидаги бундай натижага эришган олтинчи яримҳимоячига айланди.

Умуман олганда, ўйин Диего Симеоне шогирдлари учун осон кечмади. Ҳисоб 1:0 эканида Облак стандарт вазиятдан кейин ақл бовар қилмас сейв амалга оширишига тўғри келди, у собиқ жамоадоши Витселнинг бир неча метр масофадан йўллаган зарбасини қайтарди. Кейин эса жароҳат туфайли Нико Гонсалесни алмаштиришга тўғри келди. Аммо айнан унинг ўрнига туширилган Галлаҳер меҳмонларнинг ҳисобдаги устунлигини оширди. Аниқроғи, унинг у қадар хавфли чиқмаган зарбасидан кейин тўп Виктор Рейсга теккан ҳолда йўналишини ўзгартириб, дарвозабонни доғда қолдирди. Бу мавсумда жамоанинг асосий жокерига айланган Гризманн эса қўшимча дақиқаларда ҳисобни йирик кўринишга айлантирди. «Атлетико» чемпионатда захирадан тушган футболчилар урган голлар сони бўйича яққол пешқадам (9).

«Вилярреал» – «Барселона» 0:2
Голлар: Рафиня, 12 – пеналти (0:1). Ямал, 63 (0:2)
«Вилярреал»: Луис Жуниор, Марин, Вейга, Кардона, Наварро, Парехо (Масиа, 75), Комесаня, Молейро, Бюкенен, Пепе (Олувасейи, 75), Перес (Микаутадзе, 65)
«Барселона»: Х. Гарсия, Кубарси, Мартин, Балде, Кунде (Касадо, 79), де Йонг, Э. Гарсия (Бернал, 66), Фермин Лопес (Рэшфорд, 63), Рафиня, Ямал, Торрес (Левандовски, 62)
Огоҳлантиришлар: Бюкенен, 73 – де Йонг, 58
Четлатиш: Вейга, 39

Якшанба кунги ўйин бу мавсумда икки фронтдан фақат бирида, ла лигада муваффақиятли иштирок этаётган «Вилярреал» учун идеал тест вазифасини ўташи керак эди. Қолаверса, «Барселона» билан ўйинга келиб «сариқ субмариналар» аллақачон ЕЧЛ плей-оффига чиқишдан умидини узган (олти турда 1 очко) ва Сегунда вакили «Расинг» билан ўйинда ютқазиб, Испания кубогини тарк этганди. Аммо Марселино Торал шогирдлари турнир пешқадамига қарши ўйинда тенгма-тенг ўйин кўрсатди, баъзида эса яхшироқ ҳам кўринди.

Фақат, мезбонлар бахтига қарши, ҳозирда Рафиня жуда юқори спорт формасида. Бразилиялик вингер аввалига Комесаняни жарима майдони ичида ўзига қарши фол ишлатишга мажбур қилди ва пеналтини ўзи аниқ ижро этди, бу унинг қаторасига учинчи ўйинда гол уриши бўлди. Кейин эса Рафинянинг чиройли зарбаси тўп дарвоза устунига бориши билан якунланди, бу вазиятда дарвозабон Луиз Жуниор тўпни нигоҳлари билан кузатиб қолишдан бошқа чора қила олмади. Ўз навбатида, Бюкинен ва Айосе Пересга ҳужумларни якунлашда аниқлик етишмади, кейин рақиблар ҳужуми бошланишидаги офсайд ҳолати Кундени автоголдан қутқарди, Балденинг қўпол хатосидан кейин эса Жоан Гарсия яқин масофадан йўлланган зарбани тўсди, Кубарси эса тўпни дарвоза чизиғи олдида тўхтатиб қолди.

Бўлим охирида Ренату Вейга майдон марказида Ямалга ортдан қўполлик ишлатиб, жамоасини қийин аҳволда қолдирди.

Ламин бу ҳолатда «жон бераётгандек» типирчилади, аммо рақиб майдондан четлатилгач, ўрнидан туриб, ҳеч нарса бўлмагандек ўйнашда давом этди ва унинг тўп билан ҳар бир учрашиши ҳуштакбозлик билан қарши олинди.

Футболчи эса рақиб мухлисларига голи билан жавоб қайтариб, бу голни рақиб мухлислари қаршисига бориб нишонлади.

Лекин иккинчи гол ҳам ўйиндаги интригага барҳам бермади. «Вилярреал» янада катта куч билан олдинга ташланди. Марин Пареханинг узатмасидан кейин бир неча метр масофадан туриб яқин бурчакка зарба йўллади. Гарсия эса навбатдаги марта қаҳрамонлик кўрсатиб, жамоасини муқаррар голдан қутқарди. У кейинроқ яккама-якка вазиятга чиқиб келган Микаутадзе билан дуэлда ҳам ғолиб келди.

Ўйинда ҳисоб бошқа ўзгармади. «Барселона» тўғридан тўғри рақобатчиларидан бири билан орадаги фарқни оширди – энди «Вилярреал» 11 очкога ортда қолмоқда (захирада икки ўйин бор). «Реал» билан орадаги фарқ эса яна тўрт очкога етди – каталонияликлар танаффусга аъло кайфиятда йўл олди.

Германия: навбатдаги йирик ғалаба

«Ҳайденҳайм» – «Бавария» 0:4
Голлар: Станишич, 15 (0:1). Олисе, 32 (0:2). Диас, 86 (0:3). Кейн, 90+2 (0:4)
«Ҳайденҳайм»: Рамай, Майнка, Гимбер, Буш (Ниҳюс, 66), Шеппнер (Кауфманн, 66), Дорш, Ференбаҳ, Траоре, Ҳонзак (Ибраҳимович, 46), Кербер (Шиммер, 46), Пирингер (Конте, 66)
«Бавария»: Урбиг, Упамекано (Киала, 90+1), Та, Ито (Дэйвис, 73), Станишич, Горецка, Рафаэл Геррейру (Сантуш Дайбер, 72), Карл (Гнабри, 63), Диас, Олисе (Майк, 90+1), Кейн

Ўтган турда турнир жадвалининг сўнгги ўрнида бораётган «Майнц»га ютқазиб қўйишига бир бахя қолган «Бавария» бошқа бир аутсайдерга қарши ўйин олдидан керакли хулосаларни олгани маълум бўлди. Биринчи бўлимда мюнхенликлар «Ҳайденҳайм» дарвозасига иккита гол уришди. Бурчак зарбаси ижро этилганида олис устун олдида турган Жонатан Та боши билан тўпни бошқа бир ҳимоячи – Станишичга етказиб берди. Иккинчи голли ҳужум эса Карлнинг Кейнга диагонал узатмаси билан бошланди. Ҳаррининг зарбасини ҳимоячи тўсди, аммо қайтган тўпга биринчи бўлиб Ито етиб келди ва у Олисега ассистентлик қилди.

Шу билан бирга, Венсан Компани жамоасида барчаси идеал кечди дейиш қийин. Аксинча, 17-ўриндаги рақиб иккинчи бўлим давомида нафақат ҳисобни қисқартириш, балки мувозанатни тиклаш учун етарли бўлган вазиятларга эга бўлди. Амалдаги чемпионларни тўсин ва устунлар, «Ҳайденҳайм» футболчиларининг зарба беришдаги ноаниқлиги ва дарвозабон Урбиг қутқариб турди. «Бавария» футболчилари эса ўйин охирида вазиятлардан фойдаланиш бўйича мастер-класс ўтиб беришди. Аввалига Станишичнинг узатмасидан кейин ЕЧЛ ва Бундеслигадаги дисквалификацияни ўтаб, футболга қайтган Луис Диас ҳисобни йириклаштирди. Кейин эса Кейн мавсумдаги 30-голини урди.