Грета Тунберг Лондонда Фаластинга бағишланган акцияда қўлга олинди

22 ёшли швециялик экофаол Грета Тунберг 23 декабр, сешанба куни Лондон марказида қўлга олинди. Бу Фаластинни қўллаб-қувватлаш акцияси чоғида содир бўлди: бир қатор фаоллар Palestine Action ташкилотининг аввал ўтказилган бир қатор намойишлари билан боғлиқ айбловлар асосида ҳибсда сақланаётган эди.

“Фаластин учун қамалганлар” гуруҳи Буюк Британия пойтахтидаги намойиш давомида Тунберг очлик эълон қилганларни қўллаб-қувватлаш ифодаланган плакатни кўтариб турган видеони тарқатди. Плакатда шундай ёзув бўлган: “Мен Palestine Action’нинг қамалганларини қўллаб-қувватлайман. Мен геноцидга қаршиман”.

“Бугун эрталаб соат 7 лар атрофида Фенчерч-стритдаги бинога болғалар ва қизил бўёқ ёрдамида шикаст етказилди. Эркак ва аёл қасддан мулкка зарар етказиш гумони билан ҳибсга олинди. Улар ўзларини бинога ёпиштириб қўйган, мутахассислар уларни ажратиб, полицияга олиб бориш устида ишлаяпти. Бироздан сўнг воқеа жойига 22 ёшли аёл келди. У тақиқланган ташкилотни (Palestine Action) қўллаб-қувватловчи предметни намойиш этгани учун қўлга олинди”.

Британия полицияси, одатда, айблов расман қўйилмагунча гумонланувчиларнинг исм-шарифини ошкор қилмайди. Кейинроқ Грета Тунбергнинг қўлга олинганини Британиядаги Defend Our Juries ҳуқуқни ҳимоя қилиш ташкилоти ҳам тасдиқлади, деб хабар беради Reuters.

Қайд этилишича, “Фаластин учун қамалганлар” гуруҳи аввалроқ акция объекти сифатида Лондондаги бир компанияни танлаганини билдирган — уларнинг иддаосига кўра, у компания Исроил билан боғлиқ мудофаа фирмаси Elbit Systems’га хизмат кўрсатади.

Associated Press (AP) аниқлаштиришича, Буюк Британияда тақиқланган Palestine Action ташкилотининг 8 аъзоси судни кутаётган пайтда гаров билан чиқариш ҳуқуқисиз ҳибсда сақланаётганига қарши норозилик сифатида очлик эълон қилган. Илк икки маҳбус очликни 52 кундан бери давом эттирмоқда ва “ўлим реал эҳтимолга айланган танқидий ҳолат”да экани “Фаластин учун қамалганлар” гуруҳи баёнотида айтилган.

Британия ҳукумати ҳозирча суд жараёнига аралашишдан бош тортиб, гаров масаласи ва ҳибсда сақлаш тартиби судлар томонидан ҳал қилиниши кераклигини билдирмоқда.

2024 йил февралда Лондонда суд Грета Тунбергни оқлаган эди: унга нефт-газ саноатига оид йирик конференцияга киришни тўсиб қўйган норозилик акцияси вақтида полициянинг “жойни тарк этиш” буйруғига бўйсунмагани учун иш очилганди. Тунберг Швеция ва Буюк Британияда турли намойишлар билан боғлиқ фуқаровий бўйсунмаслик ҳаракатлари сабаб бир неча бор жаримага тортилган.

Буюк Британияда тақиқланган Palestine Action гуруҳини қўллаб-қувватлаш намойиши вақтида 6 сентябр куни Лондонда 425 нафардан ортиқ киши қўлга олингани ҳақида шаҳар полицияси хабар берган. 9 августда эса Лондон полицияси шунга ўхшаш акция ва шаҳардаги бошқа норозилик тадбирларида тахминан 500 нафар кишини ушлаган.

Полиция маълум қилишича, намойишчилар Буюк Британияда аввалроқ тақиқланган гуруҳ билан боғлиқ атрибутларни ҳам олиб чиққан, гарчи улар оқибатлар ҳақида огоҳлантирилган бўлса-да. Ўша акция арафасида Лондон полицияси комиссари ўринбосари ёрдамчиси Аде Аделекан шундай деб огоҳлантирган: “Palestine Action ҳаракатини қўллаб-қувватлаган ҳар ким қўлга олиниши мумкин. Оқибатларнинг жиддийлигини яна бир бор англаб етишга чақираман. Терроризм тўғрисидаги қонун бўйича ҳибсга олиниш узоқ муддатли, жуда реал оқибатларга олиб келиши мумкин”.

Июл ойи бошида Буюк Британия ҳокимияти Palestine Action’ни террористик ташкилот деб тан олган, унинг рамзлари ва атрибутларини намойиш этиш эса жиноий жавобгарликка сабаб бўладиган қилмишга айланган.

Palestine Action ташкилоти, жумладан, “Исроилни глобал қўллаб-қувватлашга барҳам бериш”ни талаб қилади ва ўзини Буюк Британияда “тўғридан тўғри ҳаракатлар орқали ҳарбий саноатни издан чиқарадиган” ҳаракат сифатида тақдим этади. Расмий равишда унинг усуллари орасида фуқаровий бўйсунмаслик қайд этилган, бироқ ўтмишда Palestine Action иштирокчилари қонунни бузган ҳолатлар ҳам бўлган.

Масалан, 2025 йил июнда унинг фаоллари Англия жанубидаги Оксфордшир графлигида жойлашган Брайз-Нортон авиабазасига кириб бориб, иккита ҳавода ёнилғи қуйувчи самолётга шикаст етказган. Илгарироқ ташкилот вакиллари Буюк Британияда Исроил мудофаасига қурол етказиб берувчи Британия ва Исроил мудофаа компанияларининг биноларини ҳам тўсиб қўйган.