Озарбойжон: Украинада ҳар икки томонда уришганлар жазоланади

Озарбойжон Бош прокуратураси Россиянинг Украинага қарши урушида қайси томонда бўлишидан қатъи назар иштирок этиш мамлакатда жиноят ҳисобланишини ва бундай қилмиш учун умрбод қамоқ таҳдиди борлигини эслатди. Идоранинг бу ҳақдаги хабари душанба куни, 29 декабрда эълон қилинди.

Идора баёнотида Озарбойжоннинг “бир қатор фуқаролари”нинг “Россия ва Украина ўртасидаги ҳарбий операцияларда, шунингдек бошқа қуролли можароларда” иштирок этишига доир “фактлар” пайдо бўлаётгани айтилган. “Афсус билан қайд этамизки, ушбу жанг операциялари оқибатида ҳалок бўлганлар, оғир яраланганлар ва асирга тушганлар орасида ҳам фуқароларимиз бор”, — дейилади хабарда.

Шунингдек, Озарбойжон Жиноят кодексидаги ёлланма жангчилик ҳақидаги модда эслатилди: у 8 йилдан умрбод озодликдан маҳрум этишгача жазони назарда тутади. Бир қатор фуқароларга нисбатан ушбу модда бўйича жиноят ишлари қўзғатилган, терговлар олиб борилмоқда. Ушбу озарбойжонликлар Украинада жанг қилган-қилмагани ва улар сони қанча экани аниқлаштирилмаган.

“Фуқароларимизни ҳушёрликни сақлашга, қонунга зид даъватларга учмасликка ва давлатимиз қонунларини ҳурмат қилишга чақирамиз”, — деб якунлаган бош прокуратура.

Озарбойжон фуқароларининг Украинадаги урушда иштирок этиши бўйича аниқ маълумотлар йўқ. 2023 йил май ойида Бокудаги Украина элчихонаси панжарасида “Хотира девори” — Украина Қуролли кучлари томонида жанг қилган ва фронтда ҳалок бўлган озарбойжонликларнинг суратлари илинган тахта очилган. Очилиш маросимида ҳалок бўлганларнинг оналари ҳам иштирок этган. Ўша пайтда у ерда 26 та исм бўлган.

2025 йил апрелида Media.az портали Украинада фронтнинг қарама-қарши томонида икки озарбойжонлик — Санан Мохсумов ва Гусейн Исаев ҳалок бўлгани ҳақида ёзган. Иккинчиси — Гусейн Исаев — қотиллик учун қамоқда ўтирган жойидан РФ Қуролли кучларига ёллангани айтилган.