ЕИ Венесуэла суверенитети ва унинг халқини ҳурмат қилишга чақирди

Европа Иттифоқининг ташқи ишлар ва хавфсизлик сиёсати бўйича олий вакили Кая Каллас Венесуэла суверенитети ҳурмат қилиниши кераклигини таъкидлаб, АҚШ томонидан Николас Мадуро қўлга олинганидан кейин мамлакатда демократияга тинч ўтишни қўллаб-қувватлашга чақирди. Бу Калласнинг якшанба, 4 январ куни кечқурун эълон қилинган баёноти — Европа Иттифоқининг расмий позициясидан келиб чиқади.

Баёнотда ЕИ фикрига кўра “Николас Мадуро демократик йўл билан сайланган президент сифатида легитимликка эга эмас”лиги айтилган. Шу билан бирга, ЕИ Венесуэлада демократияга тинч ўтиш тарафдори эканини билдириб, бу жараён “венесуэлаликларнинг ўзлари томонидан — мамлакат суверенитетига ҳурмат сақланган ҳолда” амалга оширилиши кераклигини таъкидлайди. ЕИ дипломатияси раҳбарига кўра, Венесуэла халқи иродасини ҳурмат қилиш — ҳозирги инқирозни ҳал этишнинг ягона йўли.

Каллас “қандай шароит бўлишидан қатъи назар, халқаро ҳуқуқ тамойилларига риоя қилиниши шарт” эканини қайд этиб, БМТ Хавфсизлик Кенгашининг доимий аъзоси сифатида ушбу тамойилларга амал қилишда АҚШнинг алоҳида масъулияти борлигига ишора қилди.

Баёнот матнига кўра, Европа Иттифоқи трансмиллий уюшган жиноятчилик ва гиёҳванд моддаларнинг ноқонуний айланмасига қарши курашни зарур деб ҳисоблайди, бироқ бу фақат “ҳудудий яхлитлик ва суверенитет тамойилларига тўлиқ риоя қилинган тақдирдагина” амалга оширилиши мумкин.