Эрон ҳукумати намойишларни тўлиқ назоратга олганини маълум қилди

Шунингдек, Теҳрон АҚШ ва Исроилнинг мамлакатдаги сўнгги воқеаларга алоқадорлиги ҳақида кўплаб далилларга эга эканини таъкидлади.

Фото: Getty images

Эрон ҳукумати мамлакатдаги норозилик намойишлари билан боғлиқ вазиятни назорат қилмоқда. Бу ҳақда Эрон ташқи ишлар вазири Аббос Ароқчи маълум қилди, деб хабар берди Sky News.

Унинг сўзларига кўра, мамлакатдаги умуммиллий норозилик намойишлари энди «тўлиқ назоратга олинган».

Ароқчи сўзларига кўра, Теҳрон АҚШ ва Исроилнинг мамлакатдаги сўнгги воқеаларга алоқадорлиги ҳақида кўплаб далилларга эга.

«Бизда АҚШ ва Исроилнинг Эронда сўнгги кунлардаги террорчилик ҳаракатларига алоқадорлиги ҳақида кўплаб ҳужжатлар ва далиллар мавжуд», деди у.

Хусусан, вазир АҚШ собиқ давлат котиби Майк Помпеонинг изоҳларига ишора қилди. Ароқчининг айтишича, у «Моссад агентлари тартибсизликлар иштирокчилари билан бирга бўлгани ва ушбу террорчилик ҳаракатига раҳбарлик қилганини» тан олган.

Эрон ТИВ раҳбари, шунингдек, Ғарб ҳукуматларини танқид қилиб, улар террорчиларни эмас, Эрон полициясини қоралаётганини айтди.

Декабр ойи охиридан бери Эронда кенг кўламли норозилик намойишлари давом этмоқда. Акция иштирокчилари сиёсий режимни ўзгартиришни талаб қилмоқда. HRANA инсон ҳуқуқлари ташкилоти маълумотларига кўра, камида 544 киши ҳалок бўлган. Мамлакат расмийлари норозилик намойишларини ташкиллаштиришда АҚШ ва Исроилни айблади.

Тайёрлаган: Сардор Юсупов

#АҚШ #Эрон #Исроил