Қозоғистонда алкогол савдосини чеклаш таклиф қилинди

Қозоғистонда мажлис депутати Магеррам Магеррамов бош вазирга мурожаат қилиб, алкогол маҳсулотлари савдосини кучайтириш бўйича қатор таклифларни илгари сурди. Унинг фикрича, мамлакатда маст ҳолда содир этилаётган жиноятлар улуши юқори бўлиб қолаётгани бу борада кескин чоралар кўришни талаб этмоқда.

Ички ишлар вазирлиги маълумотларига кўра, қотилликлар ва безорилик ҳолатларининг қарийб ярми, ҳар тўртинчи талончилик ва йўл-транспорт ҳодисалари, шунингдек, оилавий-маиший ҳуқуқбузарликларнинг аксарияти алкогол таъсири остида содир этилмоқда. Депутат, шунингдек, вояга етмаганлар томонидан маст ҳолда жамоат тартибини бузиш ҳолатлари ҳам қайд этилаётганини таъкидлади.

Асосий таклифлар қаторида:

• дўконларда алкогол маҳсулотларининг чакана савдосини соат 20:00 дан кейин, кафе ва ресторанларда эса соат 22:00 дан кейин тақиқлаш;
• болалар муассасалари атрофида 100 метр радиусда спиртли ичимликлар сотишга қўйилган тақиқни қайта жорий этиш;
• алкогол сотуви билан шуғулланувчи савдо нуқталари сонини чеклаш таклиф этилган.

Шунингдек, депутатлар алкогол маҳсулотларини мажбурий рақамли маркировкага эга товарлар рўйхатига киритиш, алкоголнинг онлайн савдосини тақиқлаш ҳамда ёшлар ўртасида алкоголизмнинг зарарли оқибатларини олдини олиш бўйича рақамли ва медиа платформалар орқали профилактика дастурларини ишлаб чиқишни масъул вазирликларга топширишни таклиф қилмоқда.