Қўшимча функционаллар
-
Тунги кўриниш
АҚШ Венесуэланинг олтинчи танкерини қўлга олди
Veronica танкерини “Жанубий найза” қўшма оператив гуруҳи таркибидаги денгиз пиёдалари ва денгизчилар ушлагани ҳақида АҚШ Қуролли кучлари Жанубий қўмондонлиги хабар берди.
Фото: AP
АҚШ Қуролли кучлари Жанубий қўмондонлиги хабар беришича, “Жанубий найза” қўшма оператив гуруҳи таркибидаги денгиз пиёдалари ва денгизчилар Ички хавфсизлик вазирлиги ҳамда USS Gerald R. Ford авиаташувчиси кўмагида Veronica номли танкер кемасини ҳеч қандай ҳодисасиз қўлга олган. Бу ҳақда улар пайшанба куни, 15 январда X ижтимоий тармоғида маълум қилди.
Қўмондонлик маълумотларига кўра, мазкур танкер Кариб денгизида АҚШ санкцияларига тушадиган кемалар учун жорий этилган карантин талабларини бузган. Бу — АҚШ операцияси доирасида қўлга олинган ва Венесуэла билан боғлиқ олтинчи кема.
Ушбу қўлга олиш операцияси АҚШ президенти Доналд Трампнинг Оқ уйда Венесуэла мухолифати етакчиси Мария Корина Мачадо билан учрашуви арафасида амалга оширилган.
“Новая газета Европа” аниқлаштиришича, кема эгаси сифатида Россиянинг “Буревестмарин” компанияси кўрсатилган.
Аввалроқ, 9 январ куни Olina кемасининг қўлга олиниши Венесуэла нефтини экспорт қилишда иштирок этаётган танкерларни таъқиб қилиш операцияси доирасида АҚШ томонидан амалга оширилган бешинчи тўхтатиб қолиш ҳолати бўлганди.
АҚШ ҳокимияти баҳолашича, “соя флот” кемалари Венесуэла нефт экспортининг тахминан 70 фоизига тўғри келади.
Бундан олдин АҚШ Атлантика океанида Россия компаниясига тегишли Marinera (Bella 1) танкерини ҳам қўлга олган эди. Кема икки ҳафтадан ортиқ вақт давомида АҚШ соҳил қўриқлаш хизмати кемасининг таъқибидан қочиб юрган. Россия бу танкернинг ушланишини ноқонуний куч ишлатиш амалиёти деб атаган.
