Ўзбекистон гуруч экспортида Қозоғистон биринчи ўринда

Ўзбекистон 2025 йилнинг январ–ноябр ойларида 11 та хорижий давлатга жами 14,8 минг тонна гуруч экспорт қилган. Экспорт қиймати 6,4 млн АҚШ долларини ташкил этган.

Фото: Dreamstime

Миллий статистика қўмитаси маълумотларига кўра, ҳисобот даврида Ўзбекистондан энг кўп гуруч импорт қилган давлат Қозоғистон бўлган — 8 минг тонна. Бу кўрсаткич умумий экспорт ҳажмининг катта қисмини ташкил этиб, қўшни давлат Ўзбекистон гуручининг асосий харидори сифатида қайд этилган.

Иккинчи ўринда Тожикистон жойлашган бўлиб, у ерга 3,4 минг тонна гуруч етказиб берилган. Учинчи ўринни эса Қирғизистон эгаллаган — 2,4 минг тонна.

Шунингдек, Ўзбекистондан АҚШга 824,8 тонна гуруч экспорт қилингани маълум қилинди. Афғонистон ва Туркияга 45,2 тоннадан гуруч етказиб берилган. Бошқа давлатларга эса жами 113,5 тонна маҳсулот экспорт қилинган.

Гуруч экспорти географиясининг кенгайиши ташқи бозордаги талабни қондириш, экспорт салоҳиятини ошириш ҳамда агросаноат тармоғида қўшимча қиймат занжирларини ривожлантиришда муҳим аҳамият касб этади.

Тайёрлаган: Отабек Матназаров

#экспорт #статистика #гуруч