Қиличбозлик бўйича ЕЧ Таллиндан Францияга кўчирилди: сабаб — визалар

2026 йил ёзида Таллинда бўлиб ўтиши керак бўлган қиличбозлик бўйича Европа чемпионати Францияга кўчирилди. Бу ҳақда Эстония қиличбозлик иттифоқи бош котиби Айвар Паалберг 23 январ, жума куни Õhtuleht нашрига берган интервюсида маълум қилди. Унинг айтишича, “қарор 14 январ куни қабул қилинган, аммо бизга бу ҳақда фақат бугун маълум қилинди”. Энди мусобақа Франциянинг Антони шаҳрида ўтказилади.

Турнирни кўчириш эҳтимоли ҳақидаги маълумотлар 2025 йил охирида пайдо бўлган эди. Ўшанда Халқаро қиличбозлик федерацияси Эстониядан барча спортчилар — фуқаролиги ва ҳарбий унвонидан қатъи назар — чемпионатда иштирок этиши ва чегарадан ўта олишига кафолат берувчи ёзма тасдиқ талаб қилган.

Эстония ҳукумат органлари бундай ҳужжатни имзолашдан бош тортган. Эстония Маданият вазирлигининг спорт масалалари бўйича вице-канцлери Райдо Митта Таллин турнир қатнашчиларининг барчаси учун кириш имкониятини тасдиқлай олмаслигини айтган. Унинг сўзларига кўра, ҳукумат позицияси ўзгармаган: Россия ва Беларус спортчиларига виза берилмайди, ҳеч қандай истисно назарда тутилмаган.

Эстония 2024 йилда қиличбозлик бўйича Европа чемпионатини ўтказиш ҳуқуқини олган эди.

Айвар Паалберг аввалроқ шундай деган эди: турнирни Эстонияда ўтказиш ҳақида қарор қабул қилинган пайтда Халқаро қиличбозлик федерациясининг “агрессор давлатлар” спортчиларига нисбатан бир хил қоидалари амалда бўлган, аммо бир йил давомида улар бир неча бор ўзгарган.

Паалбергнинг айтишича, дастлаб Россия ва Беларус спортчиларига армия билан алоқаси бўлмаган тақдирда “нейтрал мақом”да индивидуал мусобақаларда қатнашишга рухсат берилган. Кейинроқ эса бу талаб бекор қилинган.

Шунингдек, Паалберг федерациянинг сўнгги қарорини ҳам қайд этган: Россия ва Беларусдан бўлган юниорлар ва кадетларга ўз давлатлари байроғи остида тенгдошлари ўртасидаги мусобақаларда иштирок этишга рухсат берилган — агар улар Украинага қарши урушни қўллаб-қувватламаслик ҳақида баёнот берса. Паалберг таъкидлашича, амалда бундай баёнотнинг бажарилишини назорат қилиш жуда қийин.