Путин Трампга Эрондаги урушни якунлаш бўйича вариантларни таклиф қилди

РФ ва АҚШ президентлари декабрдан буёнги илк телефон мулоқотида Эрон ва Украинадаги урушларни муҳокама қилди, деб хабар берди Путин ёрдамчиси Ушаков. Оқ уй эса ҳозирча Трамп ташаббуси билан бўлиб ўтган ушбу музокараларга изоҳ бермади.

Фото: AFP/Scanpix/LETA

Россия президенти Владимир Путин 9 март, душанба куни кечқурун АҚШ раҳбари Доналд Трамп билан телефон орқали мулоқотда Эрондаги можарони тез орада тартибга солиш бўйича таклифларни билдирди. Бу ҳақда Путин ёрдамчиси Юрий Ушаков маълум қилди.

Ушаков баёнотларига таяниб хабар қилган бир қатор Россия ОАВга кўра, суҳбатнинг асосий мавзулари АҚШ ва Исроилнинг Эрондаги уруши, шунингдек, Россиянинг Украинага қарши уруши бўлган.

Кремл маълумотларига кўра, Путин Украинада тинч йўл билан ҳал этишга қаратилган уринишларда АҚШнинг ва шахсан Трампнинг воситачилик саъй-ҳаракатларига ижобий баҳо берган. Кремл хабарида айтилишича, суҳбат Трамп ташаббуси билан бўлиб ўтган, тахминан бир соат давом этган ва “ишчан, очиқ ҳамда конструктив руҳда” кечган.

Ушаковнинг сўзларига кўра, 2025 йил декабридан бери илк бор ўтказилган ушбу телефон мулоқоти чоғида Трамп Украинада ўт очишни тезроқ тўхтатиш ва “узоқ муддатли тартибга солишга эришиш”дан манфаатдор эканини билдирган.

Вашингтонда эса Путин билан бўлиб ўтган телефон суҳбати ҳозирча изоҳланмаган. Бундан олдин Доналд Трамп 9 март кечқурунга Эрондаги уруш бошланганидан бери илк матбуот анжуманини эълон қилган эди.