АҚШ Россия ва Украина билан уч томонлама музокараларни кечиктирди

Музокаралар, эҳтимол, келаси ҳафта бўлиб ўтади, деб маълум қилди Украина президенти Зеленский ва Трампнинг махсус элчиси Уиткофф. Киев маълумотларига кўра, учрашув Эрондаги уруш сабабли қолдирилган ва Туркия ёки Швейцарияда ўтказилиши мумкин.

Фото: Yekaterina Chesnokova/ITAR-TASS/IMAGO

Америка Қўшма Штатлари Украина ва Россия билан урушни якунлаш бўйича музокараларни бир неча кунга қолдирди. Бу ҳақда АҚШ президенти Доналд Трампнинг махсус вакили Стивен Уиткофф маълум қилди. Унинг айтишича, Украина, Россия ва АҚШ ўртасидаги навбатдаги уч томонлама тинчлик музокаралари, катта эҳтимол билан, “келаси ҳафтанинг бирор куни” бўлиб ўтади. У бу ҳақда 10 март, сешанба куни CNBC телеканали эфирида гапирди.

Муддатлар ўзгарганини Украина президенти Володимир Зеленский ҳам тасдиқлади. Унинг сўзларига кўра, уч томонлама учрашув ҳозирча келаси ҳафтага кўчирилган. Зеленский шу куни Украинада журналистларга айтишича, музокаралар 10–11 март кунлари Туркияда ўтказилиши режалаштирилган эди, аммо Яқин Шарқдаги уруш сабабли Америка томони ташаббуси билан қолдирилди. Шу билан бирга, у Украина делегацияси Туркияга боришга тайёр бўлганини қўшимча қилди. Учрашув ўтказилиши мумкин бўлган жой сифатида Туркиядан ташқари Швейцария ҳам кўрилмоқда. Аввалги музокаралар раунди феврал ўрталарида Женевада бўлиб ўтган эди.

Украина президенти, шунингдек, Киев Европа ҳам Россия билан музокараларга жалб қилиниши учун қўлидан келган барча ишни қилаётганини таъкидлади. “Европа ҳам бу йўналишда фаол бўлиши керак. Чунки биз тушунамизки, Россиядан Европани музокаралар столи атрофида кўриш истагини кутишнинг ҳожати йўқ. РФ буни истамайди, лекин биз Европа музокараларда иштирок этиши учун барча ишни қилишимиз керак, чунки Украина Европанинг бир қисми ва келажакда ҳам ЕИнинг бир қисми бўлади”, — деди у.

Бундан олдин Доналд Трамп Россия президенти Владимир Путинга қўнғироқ қилди. Суҳбатнинг асосий мавзулари АҚШ ва Исроилнинг Эронга қарши уруши ҳамда Россиянинг Украинага ҳужуми бўлганини Путин ёрдамчиси Юрий Ушаков маълум қилди. Унинг сўзларига кўра, суҳбат “ишчан, очиқ ва конструктив характерга эга бўлган”.

Ўз навбатида, АҚШ президенти Флоридадаги матбуот анжуманида Путин билан “жуда яхши суҳбат” бўлганини айтди ва Россия президенти Яқин Шарқдаги можарони тинч йўл билан ҳал қилишга “ёрдам бериш” истагини билдирганини маълум қилди. Трампнинг айтишича, у Россия президентига агар у Украинага қарши урушни тугатса, “кўпроқ фойда” келтиришини айтган. “Бу анча фойдали бўлар эди”, — деди Трамп ва Украинадаги урушни “чексиз жанг” деб атади.

“Президент Путин билан президент Зеленский ўртасида жуда катта нафрат бор, улар, назаримда, келиша олмайди. Аммо менимча, бу мавзуда ижобий суҳбат бўлди”, — дея хулоса қилди у.