Наманганда 150 млн долларлик туристик мажмуа қурилади

Наманган вилояти Поп туманида Arashan Resort йирик туристик мажмуаси қурилиши бошланди, деб хабар берди вилоят ҳокимлиги матбуот хизмати.

Умумий қиймати 150 млн доллар бўлган лойиҳа 600 гектар майдонда ташкил қилинади. Мажмуа тўлиқ ишга туширилгандан сўнг кунлик 2,5 минг нафар сайёҳни қабул қилиш, йиллик 912 минг нафар туристга хизмат кўрсатиш, 2 000 дан ортиқ янги иш ўрнини яратиш имконияти пайдо бўлади.

Бундан ташқари, мажмуа доирасида экологик туризм зоналари, экстремал ва тоғ туризми инфратузилмалари, гастрономик туризм марказлари, саёҳат ва маданий дам олиш масканлари, рекреацион ва соғломлаштириш ҳудудлари ташкил этилади.

Шунингдек, тематик парклар, тоғ чанғиси комплекслари, зиплайн, ресторан ва кафелар, очиқ осмон остидаги кинотеатр, экобозор, болалар майдончалари, спорт майдонлари ҳамда термал сув бассейнлари барпо этилиши режалаштирилган.

Қайд этилишича, лойиҳа Япониянинг Nippon Global Education and Assessment компанияси билан ҳамкорликда амалга оширилмоқда.