Трамп: АҚШ Эрон бўйича мақсадига етди, ҳужумлар тез орада тўхтайди

АҚШ ва Исроилнинг Эронга қарши уруши яқин икки-уч ҳафта ичида якунланиши мумкин. Бу ҳақда Америка президенти Доналд Трамп 1 апрел, чоршанбага ўтар кечаси Оқ уйда журналистлар билан мулоқот чоғида маълум қилди. Унинг сўзларига кўра, Эрон раҳбарияти билан келишув тузилмаган тақдирда ҳам Эронга қарши ҳужумлар тўхтатилади.

“Уларда режим алмашди. Бу менинг режаларимга кирмаган эди. Менинг битта мақсадим бор эди — уларда ядровий қурол пайдо бўлишининг олдини олиш, ва бу мақсадга эришилди. Биз ишни якунлаяпмиз ва менимча, бу, эҳтимол, икки ҳафта, балки яна бир неча кун кўпроқ вақт олиши мумкин. Аммо биз уларда бор бўлган барча нарсани йўқ қилмоқчимиз”, — дея Трампнинг сўзларини CNN телеканали келтирган.

АҚШ президенти, агар келишувга эришилса, уруш бундан ҳам эртароқ тугаши мумкинлигини истисно қилмади. Унинг таъкидлашича, Эрон ҳукумати бундай келишувни “жуда хоҳламоқда”. Бироқ, Трампнинг фикрича, умуман олганда, келишувга эришиладими-йўқми — “бунинг аҳамияти йўқ”.

Президентнинг айтишича, Америка ва Исроил ҳужумлари бошланганидан кейин Эрон томонидан, жумладан, Европа кемалари учун ташкил этилган Ҳўрмуз бўғози блокадаси бошқа давлатлар учун муаммо бўлиши керак, аммо АҚШ учун эмас.

“Агар Франция ёки бошқа бирор давлат нефт ёки газ олмоқчи бўлса, улар Ҳўрмуз бўғози орқали ўтиб, ўзлари ўз хавфсизлигини таъминласин. Бўғозда содир бўлаётган ишлар бизга тааллуқли эмас”, — деди у.

Президент, шунингдек, Яқин Шарқдаги уруш ва Ҳўрмуз бўғозининг блокадаси оқибатида нефт нархлари 50 фоизга кескин кўтарилганини ҳам изоҳлади. Трампнинг фикрича, АҚШ Эронга қарши ҳужумларни “жуда тез орада” тўхтатиши биланоқ “нархлар кескин тушиб кетади”.

28 февралдан буён АҚШ ва Исроил Эрон ҳудудига ҳаво зарбалари бермоқда. Бу ҳужумлар натижасида Эрон олий раҳбари Али Хоминаий ҳамда бир қатор юқори лавозимли амалдорлар ва куч тузилмалари вакиллари ҳалок бўлган.

Эрон эса жавоб тариқасида Исроил ва Форс кўрфази мамлакатларига ракета ва дронлар билан ҳужум қилмоқда. Ислом Республикаси баёнотларига кўра, араб давлатларига қилинган ҳужумларнинг асосий нишонлари минтақадаги Америка ҳарбий базалари ҳисобланади.

Эрон зарбалари остида Форс кўрфазидаги бир қатор мамлакатларда жойлашган нефт омборлари ва нефт ташувчи танкерлар ҳам қолган. Бундан ташқари, уруш бошланганидан бери Эрон ҳужумларидан Озарбойжон ва Европа Иттифоқига аъзо Кипр ҳам жабр кўрган.