Пит Ҳегсет уч нафар юқори мартабали генерални истеъфога чиқарди

АҚШ қуруқлик қўшинлари штаби бошлиғи генерал Рэнди Жорж истеъфога чиқди. Америка нашрларига кўра, бу истеъфо Пентагон раҳбари Пит Ҳегсет талаби билан рўй берган.

АҚШ мудофаа вазирлиги расмий вакили Шон Парнелл X ижтимоий тармоғида Жорж «қуруқликдаги қўшинлар штабининг 41-бошлиғи лавозимидан зудлик билан нафақага чиқарилгани» ҳақида ёзган.

АҚШнинг сўнгги йиллардаги энг йирик ҳарбий амалиёти (Эронга қарши уруш) даврида штаб бошлиғининг ўзгариши жуда ғайриоддий қадам бўлиб кўринмоқда.

61 ёшли Жорж – Америкадаги энг нуфузли Уэст-Пойнт ҳарбий академияси битирувчиси ҳисобланади. У Форс кўрфазидаги биринчи урушда иштирок этган, шунингдек, Ироқ ва Афғонистондаги ҳарбий ҳаракатлар фахрийси ҳисобланади.

Унинг истеъфоси сабаби ҳақида расман хабар қилинмаган. «Биз унинг хизматидан миннатдормиз, аммо армия раҳбариятини алмаштириш вақти келди», – деган CBS News нашрига Пентагон расмийси аноним тарзда.

Жоржнинг ўрнига генерал Кристофер Ла Нив армия штабига вақтинча раҳбарлик қилиб туради.

Бундан ташқари, яна икки нафар юқори мартабали зобит ишдан олинган: АҚШ армиясини ўзгартириш ва тайёрлаш қўмондонлиги раҳбари, генерал Дэвид Ҳодне ва армия Капелланлар корпуси бошлиғи, генерал-майор Уилям Грин.

Жоржнинг истеъфоси билан Пентагон раҳбари Пит Ҳегсет президент ва ҳарбий вазир маслаҳатлашадиган Бирлашган штаб бошлиқлари қўмитасини қайтадан шакллантириш жараёнини деярли якунлади.

CBS News нашри эслатишича, Жорж муқаддам Байден маъмуриятида мудофаа вазири бўлган Ллойд Остиннинг ёрдамчиси эди.

Ўтган йилнинг кузида Жорж қуруқликдаги қўшинлар вазири Дэн Дрисколл бошчилигидаги АҚШ ҳарбий делегацияси таркибида Украинага борган ва тинчлик музокаралари муҳокамасида қатнашганди.

Доналд Трамп Оқ уйга келганидан сўнг 10 дан ортиқ юқори мартабали ҳарбийлар ўз лавозимларидан айрилди, улар орасида Штаб бошлиқлари бирлашган қўмитаси раиси генерал Чарлз Браун, Ҳарбий-денгиз флоти штаби бошлиғи адмирал Лиза Франкетти, Ҳарбий-ҳаво кучлари штаб бошлиғи ўринбосари генерал Жим Слайф ва ҳарбий разведка бошлиғи Жэффри Круз бор. Ҳегсет уларнинг кўпчилигини Трампга садоқатсизликда айблаган.

Бундан ташқари, Пентагон раҳбари азалдан армия вазири Дэн Дрисколл билан келишмайди. «Ҳегсет Дрисколлни ишдан бўшатолмайди. Чунки у унинг ҳаётини жаҳаннамга айлантиради», – деган нашр манбаларидан бири.