Зеленский Исроилни ўғирланган донни сотиб олишда айблади

Украина президенти Володимир Зеленский Исроил Украинанинг босиб олинган ҳудудларидан Россия томонидан олиб чиқилган донни олгани учун санкциялар жорий этилишига эришишини айтди. Президент дон ташувчилар ва «бундай жиноий схема орқали пул топишга уринаётганлар» санкциялар остида қолиши билан таҳдид қилди.

«Ўғирланган нарсани сотиб олиш барча нормал мамлакатларда қонуний жавобгарликка сабаб бўладиган ҳаракатдир. Бу, хусусан, Россия томонидан ўғирланган ғаллага ҳам тегишли», деб ёзди Украина раҳбари 28 апрель куни ижтимоий тармоқларда. Унинг сўзларига кўра, Киев дипломатик каналлар орқали Исроилдан ўғирланган дон ортилган кемалар мамлакат портларига кирмаслигини талаб қилишга уринган, бироқ «навбатдаги шундай кема тўхтатилмаган».

27 апрель куни Украина ташқи ишлар вазири Андрей Сибига Исроилнинг Хайфа портига Украинанинг босиб олинган ҳудудларидан олиб чиқилган дон ортилган яна бир, камида иккинчи кема кирганини маълум қилди. Киев Исроил элчисини Ташқи ишлар вазирлигига чақириб, кемани қабул қилмасликка чақирди. Бунга жавобан Исроил ташқи ишлар вазири Гидеон Саар Украина бунга ҳеч қандай далил тақдим этмаганини айтди.

Кремль Украинанинг босиб олинган ҳудудлардан ғалла олиб чиқилаётгани ҳақидаги баёнотларга изоҳ беришдан бош тортди. «Киев режими Исроил билан, Исроил эса Киев режими билан ўзи шуғуллансин. Биз бу ишга изоҳ беришни ва аралашишни хоҳламаймиз», деди Россия президенти матбуот котиби Дмитрий Песков 28 апрель куни бўлиб ўтган брифингда.

Украина Ташқи разведка хизмати 2026 йил бошида Россия санкцияларни четлаб ўтиш учун Украинанинг босиб олинган ҳудудларидан донни ўзиники сифатида сотаётгани ҳақида хабар берган эди. Украина ҳисоб-китобларига кўра, ўтган йили Россия босиб олинган ҳудудларда етиштирилган икки миллион тоннадан ортиқ донни олиб чиқиб кетган. Уларнинг асосий харидорлари Миср ва Бангладеш бўлди.

Россия мунтазам равишда - камида 2023 йилдан бери - Украинанинг босиб олинган ҳудудларидан йиғилган ғаллани Исроилга етказиб бермоқда, деб хабар қилди Исроилнинг Гаарец нашри 27 апрель куни. Журналистларнинг маълумотларига кўра, бу вақт ичида мамлакатга ғалла ортилган иккита кема келган ва улардан камида биттаси туширилган. Яна камида еттита кема доннинг келиб чиқишини яширишга ҳаракат қилган.