Трамп Путин билан гаплашди

АҚШ ва Россия президентлари Доналд Трамп ва Владимир Путин 29 апрел куни бир ярим соат мобайнида телефон орқали мулоқот қилди.

РФ президенти ёрдамчиси Юрий Ушаковнинг сўзларига кўра, Путин Трампга 9 май куни сулҳ эълон қилишга тайёрлиги ҳақида маълум қилган.

Путин Доналд Трампга яқинда содир этилган суиқасд муносабати билан қўллаб-қувватлаш сўзларини билдирди ва бу жиноятни қоралади, деган Ушаков.

«Доналд Трамп яқинда Россия томонидан эълон қилинган Пасха сулҳини ижобий баҳолади. Шу муносабат билан Владимир Путин америкалик ҳамкасбига Ғалаба кунини нишонлаш даврида ҳам сулҳ эълон қилишга тайёрлигини маълум қилди. Трамп ушбу ташаббусни фаол қўллаб-қувватлади», – дея Ушаковнинг сўзларини келтирган «Интерфакс».

Аммо бироз ўтиб, Оқ уйда журналистлар билан мулоқот чоғида Трамп сулҳ ғояси ўзидан чиққанини айтди.

«Президент Путин билан узоқ суҳбатлашдим. Мен кичик сулҳ таклиф этдим ва ўйлайманки, у буни қила олади. У шу билан боғлиқ нимадир эълон қилиши мумкин. У ҳали буни эълон қилмадими? Мен ундан қисқа вақтга бўлса ҳам оташкесим эълон қилишни сўрадим... У ерда жуда кўп одам ҳалок бўлмоқда, бу аҳмоқлик», – деган АҚШ президенти.

Ушаковнинг сўзларига кўра, Трамп Путинга Украинадаги низони ҳал қилиш бўйича келишувга жуда оз қолганини айтган. «Бизнинг президент нима бўлганда ҳам махсус ҳарбий амалиётнинг барча мақсадларига эришилишини яна бир бор тасдиқлади», – дея қўшимча қилди Ушаков.

Трамп Путин билан Украина ҳақидаги мулоқоти ҳақида шундай деди: «Биз жуда яхши суҳбат ўтказдик. Биз тез орада бир ечимга келамиз, деб умид қиламан. Менимча, у ечимни кўришни истайди, шундай дейишим мумкин. Ва бу яхши».

Трамп Эрон ва Украинани қандай адаштириб юборди

Матбуот анжумани чоғида Трамп журналистлардан бирининг икки урушдан қайси бири тезроқ тугаши ҳақидаги саволига жавоб берар экан, катта эҳтимол билан, Эрон ва Украинани чалкаштириб юборди.

«Билмайман. Балки вақт чегаралари бир хил бўлар», – дея жавоб қайтарди АҚШ президенти. Ва шундай давом эттирди: «Украина… ҳарбий нуқтайи назардан улар мағлубиятга учрашди. Фейк нашрлар буни сизга айтмайди, аммо ҳарбий нуқтайи назардан… Флот… 159 кема – ва улар барчаси ҳозир сув остида ётибди».

Бир ҳафта олдин Трамп америкалик ҳарбийлар Эроннинг 159 та кемасини чўктириб юборгани ҳақида гапирганди, контекстдан келиб чиқиб айтиш мумкинки, АҚШ президенти Украинанинг эмас, Эроннинг ҳарбий мағлубияти ҳақида гапирмоқчи бўлган.

Трампнинг матбуот анжуманидан кейин Украина мудофаа кучлари зобити – Миллий хавфсизлик ва мудофаа кенгаши ҳузуридаги Дезинформацияга қарши кураш маркази раҳбари Андрей Коваленко ҳам бунга эътибор қаратди. «Трамп „чўкитриб юборилган 159 та кема“ ва ҳарбий мағлубият ҳақида гапирганида Украина ва Эронни адаштириб юборди. Бунга аниқлик киритиш муҳим», – деган Коваленко.

CNN телекомпанияси ҳам Трамп ҳарбий мағлубият ҳақида гапирганида катта эҳтимол билан мамлакат номини хато айтганини қайд этган.

Оқ уй ҳозирча Трампнинг бу сўзлари юзасидан қўшимча изоҳ бермади.

Россия ўтган сафар 2026 йил 11 апрел куни соат 16:00 дан 12 апрел куни охирига қадар Пасха сулҳи эълон қилганди.

Бу баёнотга қарамай, Украина ҳукумати биринчи кечадаёқ Россия томонидан оташкесимни бузиш билан боғлиқ юзлаб ҳолатлар ҳақида хабар берган. Россия ҳам Украинани сулҳни бузишда айблаган.

Россия томони ўшанда Пасха сулҳини узайтиришдан бош тортганди.

Бир йил олдин, 2025 йил 9 май куни ҳам Владимир Путин сулҳ эълон қилганди, ўшанда ҳам томонлар бир-бирини оташкесимга амал қилмасликда айблаганди.

Путин ва Трамп Эрон ҳақида гаплашган

Ушаков суҳбат чоғида Путин «Эрон ядровий дастури атрофидаги келишмовчиликларни ҳал қилишга қаратилган бир қатор мулоҳазалар»ни таклиф қилганини ҳам айтди. Шу билан бирга, айнан қандай таклифлар ҳақида гап кетаётганига аниқлик киритмаган.

Трамп бу таклифларни қуйидагича таърифлади: «У менга агар бизга уни олишда ёрдам бера олса, бойитиш ишларида иштирок этишни хоҳлашини айтди [катта эҳтимол билан, Ғарб давлатлари ядровий қурол ишлаб чиқиш дастурининг бир қисми деб ҳисоблайдиган Эрондаги бойитилган уран муаммоси назарда тутилмоқда]. Мен унга „Украина билан урушни тугатишда иштирок этишингни афзал кўрган бўлардим“ дедим», – деган Трамп.

Аввалроқ Россия Эроннинг бойитилган уранини ўз ҳудудида қабул қилишга тайёрлигини билдирганди. Аммо Кремл матбуот котиби Дмитрий Песковнинг сўзларига кўра, АҚШ Москванинг бундай таклифини рад этган.