Исроилни қоралаган Юлдуз Усмонованинг Ню Йоркдаги концерти бекор қилинди

Ўзбекистон халқ артисти Юлдуз Усмонова ижросида 9 май куни АҚШнинг Ню Йорк шаҳрида ўтиши белгиланган концерт бекор қилинди. Бу ҳақда 4 май куни тадбир мезбони Oceana театри хабар берди.

Концертнинг бекор қилиниши – маҳаллий сиёсатчилар томонидан қўллаб-қувватланган қаршилик кампанияси ортидан рўй берди. Юлдуз Усмонова Фаластинни қўллаб, Исроилнинг ҳаракатларини кескин танқид қилиб келгани туфайли антисемитизмда айбланмоқда.

4 май куни Ню Йоркнинг Нассау округи раиси, Ню Йорк губернатори лавозимига номзод Брюс Блейкман ҳамда маҳаллий депутатлар Майкл Новахов ва Алек Брук-Красни, шунингдек, “Бирлашган сионистлар” жамияти фаоллари иштирокида матбуот анжумани бўлиб ўтди. Улар фашистлар Германияси устидан ғалабани хотирлаш куни – 9 май санасида ўзлари “фашист” деб айблаётган Юлдуз Усмонованинг концерти ўтказилишига қаршилигини билдирган.

Брюс Блейкман хонанданинг АҚШга кириш визасини бекор қилишни сўраб, давлат котиби Марко Рубиога расмий хат йўллаганини маълум қилган. Бу эса Юлдуз Усмонованинг 11 май куни Вашингтонда бўлиб ўтиши белгиланган концертини ҳам сўроқ остида қолдириши мумкин.

Юлдуз Усмонова 5 май куни Instagram-саҳифасида берган изоҳида Ню Йоркдаги концерт учун барча чипталар сотиб бўлинганини айтиб, бунинг учун мухлисларига миннатдорлик билдирди. У Фаластинни қўллаб, Исроилни танқид қилганлари ҳақида гапираркан, ўз қарашларида собит эканини таъкидлади.

“Яҳудийлар тўпланиб, сиёсатчилар ҳам аралашган бўлса, бу ҳам бизга плюс, обрў келтиришяпти. Қарши бўлаверишсин... Лекин агар сиз яҳудий сионистлар мени узр сўрайди деб ўйласангиз, қаттиқ янглишасиз. Мен ўзимнинг [қадриятларимга] қаттиқ ишонаман. Биринчидан, мен зўравонликка қаршиман. Иккинчидан, Фаластин озод бўлсин – бу уларнинг ери”, – деди Усмонова.

У “АҚШ – Исроил эмас, АҚШ сионистларники эмас” дея, бундан буён ҳам “инсоният учун куйлашда давом этиши”ни билдирди. “Адолат, иншааллоҳ, албатта тантана қилади”, деди хонанда.

Юлдуз Усмонова Исроилнинг Фаластинга нисбатан ҳаракатларини фаол танқид қилиб келади. У 2023 йил октябрида Исроил маҳсулотларига бойкот эълон қилган.