Донбасс масаласи бўйича Трампнинг баёноти эълон қилинди

Бу ҳақда АҚШ президентининг 12 май куни Хитойга учиб кетишидан олдин журналистлар билан мулоқоти чоғида айтган сўзларидан маълум бўлди.

Журналистлардан бири Трампга: “Сиз ва Путин ўртасида Россия бутун Донбассни олиши кераклиги ҳақида қандайдир тушуниш борми?” деган саволни берган.

Трамп эса бу саволга қисқача: “Йўқ”, — деб жавоб қайтарган.

Мазкур мулоқот видеосидан парча X тармоғидаги Clash Report микроблогида эълон қилинган.

Донецк области устидан қайси томон назорат ўрнатиши Россия ва Украина ўртасидаги урушни тугатиш бўйича музокаралардаги асосий масалалардан бири ҳисобланади.

Москва бир неча бор тинчлик музокараларига тайёрлигини билдирган, бироқ буни Украина қўшинларининг Донецк, Луханск, Херсон ва Запорижжя вилоятларидан тўлиқ чиқиб кетиши билан боғлаб келмоқда.

Кремль ушбу ҳудудларни 2022 йилда ўтказилган “референдумлар” натижасига кўра Россия ҳудуди деб ҳисоблайди.

Апрель ойи охирида The New York Times тўрт нафар аноним манбага таяниб, Украина вакиллари Россия ҳали ҳам ҳарбий йўл билан эгаллашга уринаётган Донбасс ҳудудининг бир қисмини “Донниленд” деб аташ таклифини билдирганини ёзган.

Нашрга кўра, бу таклиф Трампнинг хайрихоҳлигига эришиш мақсадида илгари сурилган бўлиши мумкин.

АҚШ вице-президенти Ж.Д. Вэнс ҳудудий баҳс “бир неча квадрат километр” ҳақида эканини айтганидан сўнг, Кремль матбуот котиби Дмитрий Песков 12 апрель куни Россия ва Украина ўртасидаги ҳудудий келишмовчилик Донецк вилоятининг Москва ҳали назорат қилмаётган тахминан 17–18 фоизи билан боғлиқлигини билдирган.

Февраль ойи охирида ҳудудий келишмовчиликлар сабаб Украинадаги тинчлик музокаралари боши берк кўчага кириб қолган.

Кейинчалик Вашингтон эътибори АҚШ ва Исроилнинг Эронга қарши урушига қаратилгани таъкидланмоқда.

https://www.dw.com/ru/tramp-otricaet-nalicie-u-nego-dogovorennostej-s-putinym-o-peredace-donbassa-rf/a-77138877