Россия яна урушни танлади — Зеленский Путинга жавоб берди

Украина президенти Володимир Зеленский 5 июнь куни Россия президенти Владимир Путиннинг сўзларига жавоб қайтарди.

Фото: Ludovic Marin/ Pool Photo via AP

«Афсуски, Россия томони яна урушни танламоқда - бугунги жавобни ҳамма эшитди. Кучсиз жавоб. У шунчаки урушни тугатишни истамаяпти. Ўйлайманки, бу жавоб дунёдаги кўпчиликни хафа қилди. У ҳеч нарсани ўзгартирмоқчи эмас ва унинг уруши фақат ўзига ва ундан пул топаётганларга ёқишини тан олишни истамайди - уларнинг барчаси бугун жуда жилмайиб туришарди. Демак, Россиянинг пули камайиши, Россияга босим эса кучайиши керак. Бизга ёрдам бераётган барчага миннатдорчилик билдираман! Мен Украина билан бўлган, ҳақиқий тинчликни истаган барчага миннатдорчилик билдираман», дейилади Украина президенти телеграм каналида.

Эслатиб ўтамиз, икки давлат раҳбарларининг баҳси 4 июнь куни Зеленскийнинг Путинга йўллаган очиқ мактуби билан бошланди. Унда Украина раҳбари Россия учун уруш нархини кескин оширишга қодирлигини, аммо ҳарбий ҳаракатларни тугатиш учун шахсан учрашишга тайёрлигини айтган эди.

Бир кун ўтгач, Владимир Путин бунга жавобан Зеленский билан учрашишдан ҳеч қачон бош тортмаганини, лекин «бўш идишни яна бир бўш идишга бўшатишни» истамаслигини таъкидлади. Шунингдек, мактуб қўполлик унсурларига эгалигини ва ҳозирча Зеленский билан учрашишдан маъно йўқлигини айтди.