D гуруҳи таништируви. Мезбон АҚШ кимлар билан ўйнайди? 

Мезбон жамоа иштирокидаги гуруҳлар доим диққат марказида бўлади. Бундай жамоалар ўз мухлислари қаршисида икки карра иштиёқ билан ҳаракат қилишади, бу сафарги мундиалда эса илк бор мезбон жамоалар сони учтани ташкил этади. Шундай мезбонлардан бири бўлган америкаликлар D гуруҳидан ўрин олишган. АҚШ вакиллари гуруҳдан чиқиш учун Парагвай, Австралия ва Туркия каби жамоаларга қарши майдонга тушади.

D гуруҳи тақвими

1-тур

13 июн, соат 06:00 (Тошкент вақти)
АҚШ – Парагвай

14 июн, соат 09:00
Австралия – Туркия

2-тур

20 июнга ўтар кечаси, соат 00:00
АҚШ – Австралия

20 июн, соат 06:00
Туркия – Парагвай

3-тур

26 июн, соат 07:00
Туркия – АҚШ

26 июн, соат 07:00
Парагвай – Австралия

АҚШ

Мураббий

Маурисио Почеттино клублар футболидаги фаолияти туфайли обрў қозонган ва доимо катта клублар нигоҳидаги мутахассис ҳисобланган. «Тоттенҳэм»да ўзига хос услубга эга жамоа қуриб, Чемпионлар лигаси финалига чиққан, унинг резюмесида «ПСЖ» ва «Челси» каби бошқа номдор клублар ҳам бор.

2024 йилда АҚШ Почеттинони миллий жамоа бошқарувига олиб келиш учун олти миллион евролик йиллик маош тайинлашдан иккиланмади – у ҳозирда 2026 йилги жаҳон чемпионатида ишловчи мураббийлар орасида энг юқори маошга эга бўлган учинчи мутахассисдир. Маурисионинг ўзи ҳам фаолиятида янгилик қилишни истаганди ва Қўшма Штатлардан келган таклифга иккиланмай розилик билдирганди.

Юлдузлар

Американинг ҳозирги таркибида энг машҳур футболчи Кристиан Пулишич ҳисобланади. Ёшлигиданоқ маҳаллий футбол келажаги сифатида қаралган ушбу вингер ишончни оқлади ва Европанинг топ-даражадаги клублари сафида ўйнади. У АҚШдаги мухлислар қаттиқ ардоқлашади ва мамлакатда тўрт марта йил футболчиси деб топишган – бундай рекорд кўрсаткич билан фақат Америка футболи афсонаси Лэндон Донован мақтана олади.

Ҳозирда 27 ёшда бўлган Пулишич мамлакат миллий жамоасидаги энг яхши тўпурарлар рўйхатида кучли тўртликка кириш арафасида (ҳозирда 32 голга эга), у шунингдек, ушбу мундиалда терма жамоада энг кўп ўйин ўтказган 20 футболчи қаторига кириши кутилмоқда (ҳозиргача 84 ўйинда майдонга тушган). Уйдаги чемпионат Пулишич учун мамлакатнинг барча даврлардаги энг яхши футболчиси мақомини қўлга киритиш учун имконият бўлиши мумкин.

Жамоа ҳужум чизиғида Европанинг номдор клубларида тўп суриб келаётган Фоларин Балогун, Уэстон Маккенни, Малик Тилманн, Бренден Ааронсон ва Рикардо Пепи каби бошқа ёш юлдузлар ҳам бор. 

Реал мақсад

АҚШ 1994 йилда ҳам жаҳон чемпионатига мезбонлик қилган. Ўшанда америкаликлар Руминия, Швейцария ва Колумбия билан бир гуруҳдан жой олиб, учинчи ўринни эгаллаган ва плей-оффга чиққан, аммо бўлажак чемпионлар Бразилияга ютқазган. Бу сафар эса мухлислар гуруҳда учинчи бўлишни қабул қила олишмайди. Жамоа 1/16 финалда қулайроқ рақиб билан ўйнаш учун ҳам гуруҳда яхшироқ ҳаракат қилиши талаб этилади. Шу билан бирга, ушбу жамоадан чоракфиналдан юқори натижани кутиш ҳам тўғри бўлмайди.

Таркиб

Дарвозабонлар: Крис Брейди («Чикаго Файр»), Мэтт Фриз («Ню-Йорк Сити»), Мэтт Тёрнер («Ню-Инглэнд Революшн»).
Ҳимоячилар: Макс Арфстен («Коламбус Крю»), Сержино Дест (ПСВ), Алекс Фримен («Вилярреал»), Марк Маккензи («Тулуза»), Тим Рим («Шарлотт»), Крис Ричардс («Кристал Пэлас»), Энтони Робинсон («Фулҳэм»), Майлз Робинсон («Цинциннати»), Жозеф Скалли («Боруссия» Мёнҳенгладбаҳ), Остон Трасти («Селтик»).
Яримҳимоячилар: Тайлер Адамс («Борнмут»), Себастян Берҳалтер («Ванкувер Уайткэпс»), Уэстон Маккенни («Ювентус»), Жованни Рейна («Боруссия» Мёнҳенгладбаҳ), Кристиан Ролдан («Сиэтл Саундерс»), Малик Тиллман («Байер»).
Ҳужумчилар: Бренден Ааронсон («Лидс Юнайтед»), Фоларин Балогун («Монако»), Рикардо Пепи (ПСВ), Кристиан Пулишич («Милан»), Тимоти Веа («Марсел»), Ҳажи Райт («Ковентри Сити»), Алекс Сендеҳас («Америка»).

Австралия

Мураббий

Тони Попович – Австралиянинг яқин ўтмишида таниқлик футболчилардан бўлган, миллий жамоа сафида 59 ўйинда иштирок этган, аммо 2006 йилги жаҳон чемпионатида илк ўйиндаёқ жароҳат олганди. У кейинчалик мураббий сифатида 2014 йил «Уэстерн Сидней Уондерерс» клуби билан Осиё чемпионлар лигасида ғолиб чиқади. 2024 йилдан буён миллий жамоани бошқармоқда, яшил қитъа вакиллари саралаш босқичини ишончли ўтказди ва 16 ўйиндан фақат биттасида ютқазди.

Юлдузлар

Ҳозирги Австралия таркибида яққол ажралиб турадиган юлдузлар йўқ. Таркибдагилардан ҳеч бири Тим Кэҳилл ёки Ҳарри Кюэлл даражасига яқинлаша олмайди. Аммо дарвозабон Мэтю Райанни алоҳида ажратиб кўрсатиш мумкин. 34 ёшли посбон Европанинг етакчи лигаларида ўйнаган, «Арсенал»нинг иккинчи рақамли дарвозабони бўлган, ҳозир эса «Леванте» дарвозасини қўриқламоқда. У миллий жамоа сафида юздан ортиқ ўйин ўтказган ва жамоа сардори ҳисобланади.

Райан олдинги жаҳон чемпионатида 12 та сейв амалга оширган ва тўрт ўйиндан иккитасида ўз дарвозаси дахлсизлигини сақлаб қолганди. Австралияликлар 1/8 финалда иштирок этишида унинг ҳиссаси катта бўлганди. Тўрт йил ўтиб жамоа яна унинг қаҳрамонлик кўрсатишидан умид қилмоқда.

Реал мақсад

Австралия Осиё саралашидан осонлик билан ўтди, аммо унинг таркиби жаҳон чемпионатининг финал босқичида жиддий натижалар учун даъвогарлик қиладиган ҳолатда эмас. Жамоа 1/16 финалдан нарёғига ўта олиши даргумон.

Таркиб

Дарвозабонлар: Патрик Бич («Мелбурн Сити»), Пол Иззо («Раннерс»), Мэтю Райан («Леванте»).
Ҳимоячилар: Азиз Бехич («Мелбурн Сити»), Жордан Бос («Фейеноорд»), Кэмерон Бургесс («Суонси Сити»), Алессандро Чиркати («Парма»), Милош Дегенек (АПОЭЛ), Жейсон Жерия («Албирекс Нигата»), Лукас Ҳеррингтон («Колорадо Рэпидз»), Жейкоб Италяно (ГАК), Гарри Суттар («Лестер»), Кай Тревин («Ню-Йорк Сити»).
Яримҳимоячилар: Кэмерон Девлин («Ҳартс»), Айдин Хрустич («Ҳераклес»), Жексон Ирвин («Санкт-Паули»), Коннор Меткалф («Санкт-Паули»), Пол Окон-Энгстлер («Сидней»), Эйден О'Нил («Ню-Йорк Сити»).
Ҳужумчилар: Нестори Иранкунда («Уотфорд»), Мэтю Леки («Мелбурн Сити»), Авер Мабил («Элтам»), Муҳаммад Туре («Норвич»), Нишан Велупиллай («Мелбурн Виктори»), Кристиан Волпато («Сассуоло»), Тете Йенги («Матида Зелвия»).

Парагвай

Мураббий

Густаво Алфаро ҳам Почеттино каби аргентиналик, аммо Европада уни деярли танишмайди. У 27 йил мобайнида ўз ватанидаги клубларда ишлаган, фақат бир марта хорижга чиқиб, Саудиянинг «Ал-Аҳли» клубини бошқарган, 2020 йилдан буён эса Жанубий Америкадаги терма жамоалар билан ишлаб келмоқда.

2022 йилда у Эквадорни жаҳон чемпионатига олиб келганди, аммо гуруҳ босқичида қўлга киритилган тўрт очко плей-оффга чиқиш учун етарли бўлмаганди. Кейин Коста-Рика билан бир муддат ишлади, ушбу жамоа ЖЧ-2026 саралашини айнан Алфаро қўли остида бошлаганди, аммо 2024 йилги Америка кубогидаги муваффақиятсизликдан кейин Густаво лавозимини тарк этганди. Костарикаликлар бошқарувидаги сўнгги ўйинида Алфаро айнан парагвайликларни мағлуб этган, бир ҳафта ўтиб эса айнан ушбу жамоа бошқарувига тайинланганди. Якунда Коста-Рика жаҳон чемпионатидан қолиб кетди, Парагвай эса 16 йил ичида илк бор жаҳон биринчилигида иштирок этадиган бўлди.

Унинг бошқарувидаги Парагвайдан албатта ёрқин ўйин кутиш керак эмас. Алфаро шогирдлари ҳимоявий услубда ўйнаб, тактик интизомга риоя қилади. Парагвайликлар иккинчи қаватда яхши ҳаракатлана оладиган баланд бўйли ҳимоячилари туфайли стандарт вазиятларда хавф туғдиришади.

Юлдузлар

Жамоа сафидаги асосий юлдуз ўз вақтида «Нюкасл»даги ўйинлари билан машҳурликка эришган ва ҳозирда МЛС чемпионатида тўп сураётган Мигел Алмирон ҳисобланади. Саралаш босқичини ушбу ҳужумчи деярли алмаштиришларсиз ўтказди.

Жамоадаги яна бир юлдуз бир неча йил олдин АПЛнинг бошқа бир жамоаси «Брайтон»да порлаган, ўтган йилдан Франциянинг «Страсбур» клуби аъзоси ҳисобланган Ҳулио Энсисо эди. Аммо ушбу яримҳимоячи турнир арафасидаги йиғин вақтида жароҳат олди ва узоқ кутилган мундиалда қатнаша олмайдиган бўлди.

Реал мақсад

2010 йилда Парагвай чоракфиналда бўлажак чемпион Испанияга ютқазганди – ўйин тақдирини Вилянинг 82-дақиқада урган ягона голи ҳал қилганди. Бу сафар ўша сенсацияни такрорлаш жуда қийин бўлади. Иштирокчилар сони оширилган чемпионатда кўпчилик билан бўлгани каби ушбу жамоа учун ҳам максимал кутилма – 1/8 финалга чиқиш бўлади.

Таркиб

Дарвозабонлар: Орландо Ҳилл («Сан-Лоренцо»), Гастон Олвейра («Олимпия»), Роберто Фернандес («Серро Портено»).
Ҳимоячилар: Хуан Касерес («Динамо» Москва), Густаво Веласкес («Серро Портено»), Густаво Гомес («Палмейрас»), Хуниор Алонсо («Атлетико Минейро»), Хосе Канале («Ланус»), Омар Алдерете («Сандерленд»), Александро Майдана («Талерес»), Фабиан Балбуэна («Гремио»).
Яримҳимоячилар: Диего Гомес («Брайтон»), Маурисио Магаляйнс («Палмейрас»), Дамян Бобадиля («Сан-Паулу»), Брайан Охеда («Орландо»), Андрес Кубас («Ванкувер»), Матиас Галарса («Атланта»), Каку («Ал-Айн»), Рамон Соса («Палмейрас»), Мигел Алмирон («Атланта Юнайтед»).
Ҳужумчилар: Густаво Кабалеро («Портсмут»), Алекс Арче («Индепенденте Ривадавиа»), Габриэл Авалос («Индепенденте»), Исидро Питта («Ред Булл Брагантино»), Хулио Энсисо («Страсбург»), Антонио Санабрия («Кремонезе»).

Туркия

Мураббий

Винченцо Монтелла Жаҳон чемпионатига борган икки италияликдан бири. Ушбу мутахассис Туркияни 2002 йилдан буён илк бор жаҳон чемпионатига олиб чиқди. Монтелланинг ўзи учун ҳам 24 йил олдинги турнир охиргиси бўлиб турганди – у ўшанда гуруҳ босқичининг учинчи турида Мексикага қарши ўйинда Дел Пиеро урган голга ассистентлик қилган. Шундан буён Туркия ҳам, Винченцо ҳам жаҳон биринчиликларида кўриниш бермаган.

У ўз мураббийлик фаолиятини «Рома»да бошлади ва кейин Италиянинг бошқа бир қатор клубларида ишлади, аммо жиддий натижаларга эриша олмади. «Севиля»га сафар ҳам ўхшамади. 2021 йилда эса Монтелла Туркияда пайдо бўлди, аммо «Адана»да ҳам натижа кўрсата олмади. Унинг терма жамоалардаги фаолияти эса яхши бошланди – Винченцо Туркияни Евро-2024 саралашида қийин вазиятдан олиб чиқди ва қитъа турнирида ҳам яхши қатнашиб, фақат чоракфиналда Нидерландияга ютқазди, энди эса океанортидаги турнирда ҳам шов-шув кўтаришга ҳаракат қилиб кўради.

Юлдузлар

Туркияда яхши авлод етишиб чиққан. Ҳозирги таркибдаги қатор футболчилар мамлакат тарихидаги энг яхши футболчиларга айланиш салоҳиятига эга. Улардан асосийси эса Арда Гулердир. «Реал» яримҳимоячиси мавсумдан мавсумга кучайиб бормоқда ва трансфер нархи аллақачон 90 миллион еврога баҳоланмоқда.

Яна бир вундеркинд – Гулернинг тенгдоши, бир неча йилдан буён «Ювентус»нинг асосий футболчиси ҳисобланадиган 21 ёшли вингер Кенан Йилдиздир. Бу икки юлдуз футболчи майдоннинг турли қисмларида ўйнаши эса Монтелланинг ишини осонлаштиради. Улар майдонда бир-бирини тўлдирадиган футболчилардир. Таркибда туркларнинг кўп йиллик етакчиси Ҳоқон Чалхонўғли ҳам борлигини ёддан чиқармаслик керак. Ушбу фахрий футболчи жамоадаги балансни таъминлайди.

Реал мақсад

Евродаги кучли иштирок ва таркибдаги юқори савияли футболчилардан келиб чиқиб, Туркиянинг узоққа боришини тахмин қилиш мумкин. Бундан ташқари, жамоа чиройли ўйин орқали футбол мухлислари меҳрини қозониши мумкин. 

Таркиб

Дарвозабонлар: Олтой Байиндир («Манчестер Юнайтед»), Мерт Гунок («Фенербаҳче»), Угуржан Чақир («Галатасарой»).
Ҳимоячилар: Абдулкарим Бардакчи («Галатасарой»), Чағлар Суюнчи («Фенербаҳче»), Эрен Элмали («Галатасарай»), Ферди Кадиўғли («Брайтон»), Мериҳ Демирал («Ал-Аҳли»), Мерт Мулдур («Фенербаҳче»), Ўзан Қобоқ («Ҳоффенҳайм»), Самет Оқойдин («Ризеспор»), Зеки Челик («Рома»), Каан Ойхон («Галатасарой»).
Яримҳимоячилар: Ҳоқон Чалхонўғли («Интер»), Исмоил Юксак («Фенербаҳче»), Ўрхун Кўкчи («Бешиктош»), Солиҳ Ўзжан («Боруссия» Дортмунд), Арда Гулер («Реал»), Ирфон Қаҳвачи («Қосимпошо»), Ўғуз Ойдин («Фенербаҳче»), Юнус Оқкун («Галатасарой»).
Ҳужумчилар: Бариш Алпер Йилмаз («Галатасарой»), Жан Узун («Айнтрахт»), Дениз Гул («Порту»), Кенан Йилдиз («Ювентус»), Карим Оқтуркўғли («Фенербаҳче»).

Прогноз

• АҚШ
• Туркия
• Парагвай
• Австралия

Гуруҳда деярли тенг кучга эга жамоалар тўпланган, аммо икки жамоани фаворит сифатида кўрсатиш мумкин. Катта эҳтимол билан, АҚШ ва Туркия дастлабки икки турда олтитадан очко тўплайди ва сўнгги турда куч тежаб, дурангга имзо чекиши мумкин. Биринчи ўрин тақдирини голлар нисбати ҳал қилади ва мезбонлар дастлабки турларда имкон қадар кўпроқ гол уришга ҳаракат қилишади. Учинчи ўрин учун эса Парагвай ва Австралия рақобатлашади, Жанубий Америка ва Осиё рақобатида эса одатда биринчиси кучлироқ чиқади.