Путин Украина билан урушни тугатмоқчи – Трамп

Оқ уй раҳбарининг сўзларига кўра, Путин ўз томонидан «босимни ҳис қилмоқда» ва Россия билан Украина ўртасида тинчлик келишуви «одамлар ўйлагандан кўра анча яқинроқ».

«У [Россия президенти] бунга чек қўймоқчи, Украина ҳам бунга чек қўймоқчи, биз музокаралар олиб боряпмиз ва буни тўхтата оламизми, кўрамиз. Бу даҳшатли», деди Трамп журналистнинг Америка етакчиси билан телефон орқали суҳбатдан сўнг Путин Киевга ҳалокатли зарба бергани ҳақидаги саволига жавобан.

Кейин Трамп Россия президенти «бу уруш тугашини хоҳлаётганини» такрорлади.

«Мен сизга буни жуда аниқ айтаман. Биз [Путин билан] яхши суҳбатлашдик. [Президент] Зеленский эса аслида урушнинг ҳозироқ тугашини хоҳлайди», деди Трамп.

Унинг қўшимча қилишича, НАТО етакчилари шу ҳафта Анқарада бўлиб ўтадиган альянс саммитида Украинадаги урушни тугатишни муҳокама қилади.

«Биз НАТО саммитига борамиз, буни муҳокама қиламиз ва ўйлайманки, бу можарони тугатиш мумкин бўлади», деди президент.

Axios маълумотларига кўра, Трамп Анқарада Зеленский билан учрашмоқчи, шундан сўнг Путин билан боғланади.

Америка маъмуриятининг юқори мартабали амалдори нашрга маълум қилишича, Трамп Украина урушини тугатишга «жиддий эҳтиёж» сезмоқда, шунинг учун у Украина президенти билан бунга қандай эришиш мумкинлиги ҳақида гаплашмоқчи. Бунгача, 4 июль куни АҚШ ташкил топганининг 250 йиллиги муносабати билан Трамп билан суҳбатдан сўнг, Зеленский «урушни тўхтатишнинг ҳақиқий истиқболи» борлигини ва бу масала муҳокамаси НАТОнинг Анқарадаги саммитида давом этишини айтган эди.

Кремлнинг таъкидлашича, Трамп Россия президенти билан худди шу мавзуда телефон орқали суҳбатда «ҳарбий ҳаракатларни тезроқ тўхтатиш ва инқирозни бартараф этишнинг тинч йўлларини топишга кўмаклашишга тайёрлигини тасдиқлаган».

Июнь ойи ўрталарида Трамп Эрон билан келишувга эришгандан сўнг Украина ва Россияга «эътибор қаратишини» айтган эди.