Ню Йоркда ўзбек тадбиркори ўлим таҳдидига учрамоқда

Ню Йоркда Kun.uz билан гаплашган тадбиркор Парвиз Муҳаммадқуловга кўра, АҚШ конгресси аъзоси Ден Голдман билан унинг қаҳвахонасида содир бўлган воқеа ўлим таҳдидига уланди. Маълум бўлишича, тадбиркор қаҳва ҳақини олмаслигини айтиб, конгрессменга пулини қайтариб жўнатган. Сабаби – яҳудий сиёсатчининг ҳаракатлари Парвиз ва унинг жамоаси, айниқса электоратига маъқул эмас. Бироқ пулнинг қайтгани хабарини олган Голдман тадбиркорни антисемитизмда айблаган. Бугун Парвизга 100 дан ортиқ очиқ хатлар келиб, уни ўлдиришлари ёзилган.

Июн ойининг охирида АҚШ конгресси аъзоси, ню йорклик сиёсатчи Ден Голдман қизи билан ўзбекистонлик тадбиркор Парвиз Муҳаммадқуловга тегишли Poetica Coffee қаҳвахонасига келади. Харидни амалга ошириб, чиқиб кетади. Лекин қаҳвахона ишчиси унинг келгани ҳақида Парвизга хабар бериб, конгрессмен қолдирган чойчақани олмаслигини айтади. Тадбиркор қаҳва ҳақини ҳам қўшиб жўнатишларини ҳамда қайтиб қаҳвахонага келмаслигини илова қилишларини сўрайди.

Шунда Голдман олган қаҳва ҳақи ҳамда чойчақа ўзига қайтарилади. Хабарни кўрган сиёсатчи эса тадбиркорни антисемитизм, одам ажратишда айблайди. Ню Йоркда Kun.uz билан гаплашган Муҳаммадқуловга кўра, Голдман воқеани ҳаддан зиёд бўрттирган ва ўзининг яқинлашаётган сайлови олдидан пиарига айлантирган. Ростдан ҳам қатор АҚШ оммавий ахборот воситалари воқеа юзасидан материаллар тайёрлаган, уларда сиёсатчи чиқиб қаҳвахонани антисемитизмда айблаган.

“Хизмат кўрсатилган, аслида ким ёки қайси динда бўлишининг умуман аҳамияти йўқ. Биз ўз конгрессменимизнинг ишларидан норозимиз, чунки у айнан мен яшайдиган 10-тумандан сайланган вакил. Биз унга почтадан ёзамиз, хат жўнатамиз, мурожаат қиламиз, асло жавоб қайтармайди. Биз солиқ тўловчилармиз, Голдман бизнинг фикримизни инобатга олмасдан, Исроилга ёрдам беришни маъқуллаб, овоз беради. Бу бизнинг, қўшниларимнинг, тумандошларимнинг позицияси эмас-ку. Мен ҳам ундай инсонларга хизмат кўрсатишни истамайман”, - дейди ўзбек тадбиркори.

Маълум бўлишича, Голдман телевизордаги чиқишлари билан чекланмаган. Қаҳвахона олдида намойишлар ўтказилган. Бу уюштирилган намойиш эди фикримча, дейди Парвиз.

“Биз 18 тача одамни санадик, уларнинг катта эҳтимол билан ишлари шу. Чунки эътибор берсак, айнан шу одамлар бошқа жойларда ҳам намойишларда юришибди. Ҳаттоки, келган полициячилар сони намойишчилардан кўп эди. Мен умуман намойишларга қарши эмасман, бу инсоннинг бирламчи ҳуқуқларидан, қилаверишсин. Лекин ёритгани келган медиа бир томонлама ёритди, ичкарида бизнинг тарафда бўлган яҳудийларни кўрсатмади”, дея қўшимча қилади Муҳаммадқулов.

Тадбиркорга кўра, орадан вақт ўтгач, унга хатлар кела бошлаган. Бугунгача камида 100 га яқин хатлар, почта орқали хабарлар, аноним хабарлар олган. Уларда мусулмонларга ўлим, тадбиркорни ўлдириш ёки машинасини портлатиш ва бошқа таҳдидлар ёзилган эди. Парвиз ижтимоий тармоқлар, айниқса Instagramʼдаги саҳифасини ўчиришга қарор қилади. Оилам ва ўғлим билан расмларим бор эди, шунинг учун ўчиришга мажбур бўлдим, дейди у.

Тадбиркор аллақачон АҚШ ҳуқуқ-тартибот идораларига мурожаат қилган, полиция ва керакли департаментлар иш олиб бормоқда. Ҳозиргача бир киши ҳибсга олинган. Ҳар куни полиция нималар қилаётгани ҳақида менга хабарлар йўллайди, телефон қилади, дейди Муҳаммадқулов.

Суҳбат давомида ўзбек тадбиркори АҚШдаги бугунги ҳаёт, ҳозирги маъмуриятнинг сиёсати, Ўзбекистон ҳақида фикрлари билан ҳам бўлишди.

Маълумот учун, тадбиркор Муҳаммадқулов бундан 20 йил аввал, яъни 2006 йилда Green card орқали АҚШга кўчиб ўтган. Шу йил 20 йил муддатда эса фақат бир мартагина ватанига бориб-қайтган. Ўзбекистон ўзгарди, кўп яхши ишлар қилинди дейишади, яқинда бориб ўз кўзим билан кўрмоқчиман, дейди у.

Ню Йорк, АҚШдан Kun.uz учун махус тайёрланди.