Илҳом Алиев ўз турмуш ўртоғини биринчи вице-президент этиб тайинлади

Фото: AP

Озарбойжон президенти Илҳом Алиев ўзининг турмуш ўртоғи Меҳрибон Алиевани республиканинг биринчи вице-президенти этиб тайинлади. Бу ҳақида давлат раҳбарининг матбуот хизмати хабар берди.

Мамлакат конституциясига кўра, давлат раҳбари ўз мажбуриятларини бажара олмай қолган тақдирда президент ваколатлари биринчи вице-президентга ўтади.

Ўтган йилнинг сентябрида Озарбойжонда конституцияга ўзгаришлар киритишга доир референдум бўлиб ўтди. Бошқа ваколатлар билан бир қаторда президент ваколатлари муддати 5 йилдан 7 йилга узайтирилди, вице-президентлар лавозимлари жорий қилинди, давлат раҳбари лавозимига номзодларга нисбатан ёшга доир чекловлар бекор қилинди. Алиева тайинлангунга қадар биринчи вице-президент лавозими бўш бўлган.