Toshkentda noqonuniy buzilgan reklama bilbordi harakatdagi avtomobil ustiga quladi

Toshkent shahrida reklama konstruksiyalari amaldagi tartibga zid ravishda, sud qarorisiz buzib tashlanishi davom etmoqda. Shunday holatlardan biri baxsiz hodisaga olib keldi.

8 iyun kuni tushga yaqin Chilonzor tumani Bunyodkor shohko‘chasida, «G‘afur G‘ulom» bog‘i qarshisida demontaj qilinayotgan reklama bilbordi ko‘chada harakatlanib ketayotgan Spark avtomobili ustiga quladi.

Avtomobil haydovchisi Kun.uz bilan suhbatda ma'lum qilishicha, hodisa oqibatida hech kim jabrlanmagan, ammo mashinaga ziyon yetgan.

Haydovchining so‘zlariga ko‘ra, reklama konstruksiyalarini buzayotgan kishilar Toshkent shahar hokimligidan ekanligini, konstruksiyalar shahar hokimi o‘rinbosarining buyrug‘i asosida buzilayotganini bildirgan.

Shundan so‘ng hokimlik vakillari yiqitilgan konstruksiya tufayli avtomobilga yetkazilgan zarar ikki o‘rtada, 50/50 tarzida qoplanishini aytgan. «Biz ham buyruqni bajaryapmiz, pulini to‘lab berolmaymiz», deyishgan mas'ullar.

Haydovchi bunga rozi emasligini aytib, yo‘l harakati xavfsizligi xodimini chaqirgan. Uning aytishicha, YHX xodimi ham hokimlik vakilining gaplarini quvvatlab, bu «bahsli vaziyat» ekanini bildirgan va avtomobilni jarima maydoniga olib borib qo‘ygan.

Kun.uz holat yuzasidan qo‘shimcha ma'lumotlar to‘plamoqda.

Eslatib o‘tamiz, bir necha oydan buyon Toshkent shahrida tadbirkorlarning reklama konstruksiyalari sud qarorisiz, og‘zaki buyruq asosida Toshkent shahar hokimligi mas'ullari tomonidan buzib tashlanyapti.

Tadbirkorlarning bu borada bir necha marta davlat tashkilotlariga yozgan shikoyatlari e'tiborsiz qolyapti.

May oyi oxirida Toshkent shahar hokimi Jahongir Ortiqxo‘jayev yoshlar bilan uchrashuvdan keyin jurnalistning shu mavzudagi savoliga javob bermay ketib qolgandi.

Mavzuga doir: