Toshkentdagi reklama konstruksiyalarini buzishga oid qaror loyihasi adliya organlarida ekspertizadan o‘tkazilmagan - Biznes-ombudsman

Dastlabki o‘rganishlarga ko‘ra, tadbirkorlarga tegishli reklama konstruksiyalarining demontaji Xalq deputatlari Toshkent shahar Kengashining 2021 yil 27 martdagi 323/37-6-sonli “Toshkent shahrida tashqi reklama sohasidagi faoliyatni tartibga solish to‘g‘risida”gi qarori asosida amalga oshirilmoqda.

Biznes-ombudsman tomonidan yuqoridagi qarorning qonuniyligi o‘rganilganda, “Normativ-huquqiy hujjatlar to‘g‘risida”gi qonunning 21 va 22-moddalari talablariga asosan, ushbu qaror loyihasi adliya organlarida ekspertizadan o‘tkazilmagani aniqlandi.

“Shundan kelib chiqib, O‘zbekiston Respublikasi Oliy Majlisi Senatidan Xalq deputatlari Toshkent shahar Kengashining yuqoridagi qarorning qonuniyligiga baho berish hamda vakolat doirasida uning qayta ko‘rib chiqilishida amaliy yordam berish so‘raldi”, deyiladi rasmiy xabarda.

Ta'kidlanishicha, ayni paytda biznes-ombudsman idorasi tomonidan ushbu holat yuzasidan qo‘shimcha o‘rganishlar olib borilmoqda.

Eslatib o‘tamiz, shu yilning aprel oyida Kun.uz'ga murojaat qilgan bir guruh tadbirkorlar Toshkent shahrida ularga tegishli tashqi reklama obektlari mahalliy hokimiyatlar tomonidan hech qanday hujjatsiz buzib tashlanayotganidan shikoyat qilishgan edi.

Kun.uz surishtiruvi davomida poytaxt ko‘chalaridagi reklama bilbordlariga keng miqyosli «snos» e'lon qilingani, reklama konstruksiyalari sud qarorisiz buzilayotgani, bu jarayonda tadbirkorlar huquqlari poymol etilayotgani ma'lum bo‘lgandi.

Monopoliyaga qarshi kurashish qo‘mitasi Toshkentdagi reklama obektlarini tartibga keltirishda taraflarni qonunlarga rioya qilishga chaqirgan edi.

Ijtimoiy tarmoqlarda tashqi reklama obektlari mahalliy hokimiyatlar tomonidan hech qanday hujjatsiz buzib tashlanayotgani va bunga nisbatan mas'ullar tomonidan hech qanday chora ko‘rilmayotgani ortidan tadbirkorlar o‘z mulklarini himoya qilishning noodatiy usulidan foydalanishayotgani aks etgan suratlar tarqalgandi.