«Рақобат тўғрисида» ва «Табиий монополиялар тўғрисида»ги қонунлар бирлаштирилиши мумкин

Монополиядан чиқариш қўмитасида янги таҳрирдаги «Рақобат тўғрисида»ги қонун лойиҳаси муҳокама қилина бошлади, деб ёзмоқда Norma.

Янги таҳрирда иккита: «Рақобат тўғрисида» ва «Табиий монополиялар тўғрисида»ги қонунларни қўшиб юбориш назарда тутилган.
 
Қўмита мутахассислари амалдаги қонун ҳужжатларида назарда тутилмаган алоҳида моддаларни киритишни таклиф қилдилар:
 
• рақобат принциплари;
• давлат кўмаги, монопсония (бозордаги вазият, бунда ягона харидор кўплаб сотувчилар билан ҳамкорлик қилиб, улардаги нарх ва сотиш ҳажмини белгилайди, таҳр.) тушунчасининг жорий этилиши;
• рақамли бозорлар;
• савдо фаолиятини монополияга қарши тарзда тартибга солиш;
• монополияга қарши комплаенс (таҳдидларга қаршилик қилиш ва хатарларни бошқариш тизими).
 
Қўмита бизнес-муҳит, илмий доиралар, экспертлар ҳамжамияти, жамоат ва халқаро ташкилотлар вакилларини ҳам мазкур қонунни такомиллаштиришда иштирок этишга чорлаган.